اسلام آباد۔ 05 نومبر(اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ جہانی ادارہ جان جوڑی پاکستان اٹی جان جوڑی نا بشخ انا گچینی کن بروک آ 5 سال اکن 886 ملین ڈالر نا بھلو زراس خڑچ کیک ہراڑکن ڈبلیوایچ او و وزارت جان جوڑی نا نیام اٹ کنٹری کوآپریشن سٹریٹجیز(سی سی ایس)2020-2025آ دستخط مسنے۔ وزارت جان جوڑی نا کنڈآن جاری بیان نا رداٹ دستخط نا دود اٹی وزیراعظم نا خصوصی کمکار ڈاکٹر فیصل سلطان، سیکرٹری جان جوڑی ڈاکٹر عامر اشرف خواجہ و ڈبلیو ایچ او پاکستان نا سروک ڈاکٹر ماہی پالا پلیتھا خصوصی بشخ ہلکر۔ معاہدہ نا اعلامیہ نا رداٹ حکمت عملی ٹی ایڈوانس یونیورسل ہیلتھ کوریج، ہیلتھ ایمرجنسی و دراخ جوڑ آبادی نا سیکٹر آتے اولیتی بنداو آ تخنگانے۔ داوخت آ خصوصی کمکار قومی جان جوڑی ڈاکٹر فیصل سلطان ڈبلیو ایچ او نا پاکستان کن جان جوڑی نا بشخ اٹی کمکاری نا ستاءِ کرسا پارے کہ پاکستان نا شعبہ جان جوڑی نا گچینی ٹی جہانی ادارہ جان جوڑی نا دیرپا عزم ستاکڑزک۔ اوپارے کہ حکمت عملی نا رداٹ پاکستان و جہانی ادارہ جان جوڑی نا نیام اٹ شعبہ جان جوڑی نا بابت کمکاری ءِ پین مون آ دننگ رسینگک۔ ڈاکٹر فیصل پارے کہ کوویڈ۔ 19 نا مون ءِ توننگ تون اوار ایلو ایمرجنسی و اصلاحاتی پروگرام تا نافذ کننگ اٹ ڈبلیو ایچ او نا اہم ءُ کڑد اسے۔ داوخت آ ڈبلیو ایچ او پاکستان نا سروک ڈاکٹر ماہی پالا پارے کہ پاکستان نا ہیلتھ و ڈویلپمنٹ بشخ آتیٹی پٹ وپول آن پد ڈبلیو ایچ او نا کنڈآن سی سی ایس نا بناءِ کننگ نا فیصلہ ءِ کننگا۔ ڈبلیو ایچ او نا کنڈآن جان جوڑی نا بشخ اٹی گچینی کن دراستی راستی کرفوک پوسکن آ اصلاحات ہم حکمت عملی نا بشخ جوڑ کننگک۔ داوخت آ سیکرٹری ہیلتھ ڈاکٹر عامر اشرف خواجہ پارے کہ ڈبلیو ایچ او نا کنڈآن پاکستان نا جان جوڑی نا بشخ اٹی تعمیری کڑد ادا کننگ انگ ءِ۔ مالی و ٹیکنیکل وسیلہ غاتا موبلائزیشن اٹ ڈبلیو ایچ او پروگرامک بے کچ کارآمد ئسر۔
