پاکستان و چین سی پیک تون اوار تین پہ تینی است خواہی نا ڈٹ آتے زوت ایسر اسکان سرکننگ کن سنبرینگوک ءُ، مخدوم شاہ محمود قریشی

اسلام آباد۔ 05 نومبر (اے پی پی) وزیر خارجہ مخدوم شاہ محمود قریشی پارینے کہ پاکستان و چین سی پیک تون اوار تین پہ تینی است خواہی نا ڈٹ آتے ایسر اسکان سرکننگ کن سنبرینگوک ءُ۔ ہڑتوم آ ملک آتا نیام اٹ برادرانہ تعلقداری و بے مٹ سنگتی مچ آ دنیا کن اسہ درور اسے۔ داہیت ءِ او پاکستان اٹی چین نا پوسکن آ سفیر نونگ رونگ تون گپ وتران کرسا پارے۔ ہرا پنچ شنبے نادے آ وزارت خارجہ ٹی اوڑتون اوڑدہی کرے۔ گپ وتران اٹی ہڑتوم آ کنڈآتا تعلقداری، کرونا جہانی دینی حالیت آتون اوار تین پہ تینی است خواہی نا باندات آتیا گپ وتران کننگا۔ وزیر خارجہ چینی سفیر ءِ پاکستان آ بننگ آ و بطور سفیر منصب ءِ سنبھالنگ آ مبارکبادی تس و پارے کہ نے کون آ بھلو آزموندہ اس تخوک آ شخصیت نا پاکستان اٹی تعیناتی آن اقتصادیات، انفراسٹرکچر تون اوار کثیر الجہتی بشخ آتیٹی ہڑتوم آ کنڈآتا کمکاری ءِ پین مون آ دننگک۔ شاہ محمود قریشی پارے کہ پاکستان و چین نا نیام اٹ بے مٹ برادرانہ تعلقداری و بے مٹ سنگتی ءِ مچ آ دنیا چاہک۔ ہڑتوم آ ملک آک ہرمشکل و سخت وخت اٹی اسہ ایلو نا پبی کمکاری ءِ کریر۔ شاہ محمود قریشی پارے کہ کورونا جہانی دینی چیلنج اتون مون تننگ کن چین انا کنڈآن تروک آ وخت آ کمکاری ستاکڑزک۔ ہراڑآ ای نا کمک اٹ چینی سرکڑدہ غاتا منت واری ءِ ہرفیوہ۔ حنان(چین) اٹی چینی وزیر خارجہ وانگ ژی تون مروک آ اوڑدہی نا حوالہ ءِ ترسا وزیر خارجہ پارے کہ ہڑتوم آ ملک آتا سرکڑدہ غاک سی پیک تون اوار تین پہ تینی است خواہی نا ڈٹ آتے زوت ایسر اسکان سرکننگ کن سنبرینگوک ءُ۔ سی پیک نا ارٹ میکو ریسہ نا رداٹ برجا غٹ ڈٹ آتا ترند تر پوروی ءِ پک کننگ کن گام گیج کننگ انگ ءِ۔ چینی سفیر نونگ رونگ وزیر خارجہ نا منت واری ءِ ہرفسا، پاکستان و چین نا نیام اٹ ہڑتوم آ کنڈآتا تعلقداری تے پین سوگو کننگ کن تینا غٹ تر کوشست آتے کاریم اٹ اتنگ نا باوری کرفے۔