پاکستان بوسنیا تون پارلیمانی رابطہ غاتے پین مون آ دننگ نا خواہندار ءِ، اسپیکر قومی اسمبلی اسد قیصر

اسلام آباد۔ 05 نومبر (اے پی پی) اسپیکر قومی اسمبلی اسد قیصر پارینے کہ پاکستان بوسنیا تون تینا پارلیمانی تعلقداری تے بھازاہمیت ایتک و تین پہ تینی پارلیمانی رابطہ غاتے پین مون آ دننگ نا خواہندار ءِ، پارلیمانی رابطہ غاتا کمک اٹ ہڑتوم آ ملک آتا نیام اٹ کاروباری بشخ آتیٹی ودکی بننگ کیک۔ داخیال آتا درشانی ءِ او پنچ شنبے نادے آ بوسنیا ، ہرزیگووینا نا پریذیڈنسی نا چیئرمین شفیق جعفرووچ تون اوڑدہی ٹی گپ وتران کرسا کرے۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا ایلو اہم باندات آتیا گپ وتران کننگا۔ اوڑدہی ٹی اسپیکر قومی اسمبلی پارے کہ پاکستان بوسنیا تون تینا پارلیمانی تعلقداری تے بھاز اہمیت ایتک۔ پاکستان بوسنیا تون پارلیمانی رابطہ غاتے پین مون آ دننگ نا خواہندار ءِ۔ اوپارے کہ پارلیمانی رابطہ غاتا کمک اٹ ہڑتوم آ ملک آتا نیام اٹ کاروباری بشخ آتیٹی ودکی بننگ کیک۔ ساڑی حکومت زرگزرانی شونداری نا دوئی کننگ کن بوسنیا تون واپار نا بشخ آتیٹی کمکاری ءِ ودفنگ خواہک۔ اسد قیصر پارے کہ سی پیک نا رداٹ برجا شونداری ڈٹ آتا پوروی آن پاکستان تون اوار ڈیہہ نا ایلو ملک آتیٹی شونداری و شونہالی بریک۔ پاکستان نا است خواہی ءِ کہ بوسنیا سی پیک نا رداٹ مروک آ زرگزرانی سرجز اٹی بشخدار مرے۔ اوپارے کہ پاکستان ڈیہہ ٹی شونداری و شونہالی کن ڈیہہ نا غٹ ملک آتون تینا تعلقداری تے ودفنگ خواہک۔ داوخت آ بوسنیا، ہرزیگووینا نا پریذیڈنسی نا چیئرمین شفیق جعفرووچ پارے کہ بوسنیا پاکستان تون تینا تعلقداری تے بھاز قدر انا نظر اٹ ہرک۔ بوسنیائی پارلیمنٹ پاکستان تون پارلیمانی تعلقداری تے اولیتی بنداو تیا مون آ دننگ خواہک۔ اوپارے کہ پاکستان و بوسنیا ٹی بے پناہ زرگزرانی وارخواہی ساڑی ءِ ہراڑآن ہڑتوم آ ملک آتا زرکارآک فائدہ دوئی کننگ کیرہ۔