پاکستان حق خودارادیت نا دوئی کننگ اسکان کشمیری تا اخلاقی، سفارتی و سیاسی کمکاری ءِ برجاتخک، مخدوم شاہ محمود قریشی

اسلام آباد۔ 05 نومبر (اے پی پی) وزیر خارجہ مخدوم شاہ محمود قریشی پارینے کہ کشمیر نا ویل ننا خارجہ پالیسی نا اہم تمبہ ءِ، پاکستان کشمیری تا روا حق، حق خودارادیت نا دوئی کننگ اسکان اوفتا اخلاقی، سفارتی و سیاسی کمکاری ءِ برجاتخک۔ داہیت ءِ او جموں و کشمیر تحریک حق خودارادیت انٹرنیشنل نا چیئرمین راجہ نجابت حسین تون گپ وتران کرسا پارے ہرا پنچ شنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی مقبوضہ جموں و کشمیر اٹی برجا انسانی حق انا بھلا خلاف ورزی و ڈیہہ ٹی امن و سوگوی ءِ مون تروک گڑتی تا بابت گپ وتران کننگا۔ وزیر خارجہ پارے کہ کشمیر نا ویل ننا خارجہ پالیسی نا اہم تمبہ ءِ۔ کودک کشمیری تیا کروک آ ظلم ءِ جہانی کہول آ تالان کننگ نا بابت پیشن نا ملک رہینگوک آ پاکستانی و کشمیری تا خذمت آک ستاکڑزک۔ شاہ محمود قریشی پارے کہ 5 اگست 2019ء نا اسہ کنڈی و غیر کانودی گام گیج آتے غٹ کشمیریک یکسر مسترد کرینو۔ کشمیری تا توار ءِ توننگ کن بھارتی کوزہ گیر فوج انا کنڈآن کودک کشمیری تیا ظلم انا زی آ ظلم کننگ انگ ءِ۔ پاکستان، کشمیری تا توار ءِ پدریسہ، اقوام متحدہ، یورپین یونین، انسانی حق انا ادارہ، او آئی سی، تون اوار اہم جہانی فورم تیا ہرفنگ ءِ۔ پاکستان، کشمیری تا روا حق، حق خودارادیت نا دوئی کننگ اسکان اوفتا اخلاقی، سفارتی و سیاسی کمکاری ءِ برجاتخک۔ راجہ نجابت حسین پارے کہ تحریک حق خودارادیت برطانیہ، یورپ، پاکستان و آزاد کشمیر اٹی کانفرنس، سیمینار نا اڈتننگ نا کمک اٹ کشمیری تیا کروک آ ظلم انا پڑدہ ءِ پاش کننگ ءِ۔ چیئرمین تحریک حق خودارادیت انٹرنیشنل راجہ نجابت حسین کشمیری تا توار ءِ گچین وڑاٹ جہانی کہول آ تالان کننگ و گچین خارجہ پالیسی ءِ تینا کرسا، بھارتی بیدادی ءِ منظر عام آ اتنگ آ وزیر خارجہ مخدوم شاہ محمود قریشی نا منت واری ءِ ہرفے۔ یوتھ پارلیمنٹ پاکستان نا صدر عبید قریشی و چیئرمین یوتھ ونگ ذیشان عارف ئسک ہم دا اوڑدہی ٹی ساڑی ئسر۔