اسلام آباد۔4نومبر (اے پی پی):نوکیں پاکستان ہائوسنگ منصوبگ، ءِ چیر دستی ءَ چاگرد ءِ ھمزوریں ھاسیں رنگ ءَ کمو پگار گروک آنی واستہ یک کوٹی ءِ پجاری حکومت ءِ ترجی آنی تہ ءَ ھوار انت۔ پیسریگیں حکومت آنی رد ءَ استیں حکومت ءَ وتی منشور ءِ چیر دستی ءَ کم کٹ کنوکیں مردم آناں پنجاھ لکھ گس ءِ پجاری ءِ واستہ ٹوھیں کوشست ءُ مھکمیں جزم ءِ درشان ءَ کنان ءَ فیڈرل گورنمنٹ ایمپلائز ہائوسنگ اتھارٹی ءَ را زمہ واری دیگ بوتگ ایشی ءَ حکومت ءِ گیشینتگیں سیم سر آنی رد ءَ جتا جتائیں سکیم آنی بنگیج کتگ۔ اتھارٹی جندی زمین ءُسرڈگار آنی یکجائی منصوبگ ءُ سرکاری زمین آنی ت ءَ حکومتی پروگرم آنی چیر دستی ءَ اے سکیم آناں سرجم کنگ ءَ انت۔ جتا جتائیں جیڈھ آں ابید پی ٹی آئی ءِ حکومت پاکستان ءَ را ریاست ءِ مدینہ ءِ نمونگر ءَ گہبودی نمونگ ءِ مملکت ءِ جوڑ ءِ واستہ مزن وزیر عمران خان ءِ وژن ءِ چیر دستی ءَ بزگریں مردم آںی واستہ کم کٹ کنوک آناں گس آنی جوڑیشت ءِ کوشت ءَ کنگ ءَ انت۔ استیں حکومت ءَ وتی دو سال ءِ ساھت ءَ گس آنی جوڑیشت ءِ واستہ بینک آں چہ وام ءِ در جنگ ءِ واستہ آسانی پجاری کنگ ءِ واستہ کانود جوڑ کنگ ءَ ھوار بازیں گامگیج کنگ ءَ انت۔ حکومت ءَ دسمبر 2019 ءَ بھارہ کہو پروجیکٹ ءِ گرین انکلیو۔1 ءَ ھوار جتا جتائیں مھتلی ءِ آماچیں منصوبگ آناں برجا کتگ ءُ دزبندی کنوک آناں 3282 پلاٹ الاٹ کتگ۔ اتھارٹی ءَ سکائی گارڈن پراجیکٹ ءِ چیر دستی ءَ 5198 پلاٹ الاٹ کتگ ءُ لائٖ اسٹائل ریزیڈنسی اپارٹمنٹ G-13 سکیم ءِ چیر دستی ءَ 3240 پلاٹ الاٹ کتگ، مزن وزیر ءَ کشمیر ایونیو جی -13 اسلام آباد اسکیم ءِ بنگیج کتگ ایشی ءِ چیر دستی ءَ 1467 اپارٹمنٹ جوڑ کنگ بوتگ۔ مزن وزیر عمران خان ء، سروکی ءَ 22 اکتوبر 2020 ءَ راجی رابطہ کمیٹی برائے ہائوسنگ ، جوڑیشت ءُ ڈویلپمنٹ ءِ ھمک ھپگی دیوان ءَ گورنر اسٹیٹ بینک ءَ گیری ءُ بزگیں مردم آنی واستہ آسانی کست آںی سر ءَ وام ءِ پجاری ءِ بابت ءَ بریفنگ دات۔ نینشل بینک، الائیڈ بینک، میزان بینک، بینک الحبیب، حبیب بینک ءُ بینک آف پنجاب ءِ سروک آں مزن وزیر ءَ را نوکیں پاکستان ہائوسنگ پروگرام ءِ چیر دستی ءَ وام آنی پجاری ءِ بابت ءَ سرپد کت۔ دیوان ءَ را گوشگ بوت کہ وام آنی در جنگ ءَ را آسان کنگ بوتگ ءُ اے رد ءَ برانچز آنی تہ ءَ جتا جتائیں ڈیسک جوڑ کنگ بوتگ۔ جندی بینک، اسلامی ءُ روایتی بینکاری دوئیں آںی چیردستی ءَ وام آنی پجاری کنگ ءَ آں۔ بینک آنی سروک آں جوڑیشت ءِ سیکٹر ءِ دیمروئی ءُ گریبیں تبک ءِ مردم آناں وتی گس ءِ جوڑ کنگ ءِ آسراتی پجاری کنگ ءَ سرجمیں رنگ ءَ کمک کنگ ءِ دل یکیمی کنائینت۔ آئی ءَ گوشت کہ مزن وزیر ءُ حکومتی معاشی ٹیمب ءَ را کورونا ھوپ ءِ رد ءَ کاروباری تبک ءَ ھوار بینک آنی واستہ کتگیں گامگیج آناں توسیپ ءُ ستا پیش کت۔ دیوان ءَ را سرپد کنگ بوت کہ وام آنی پجاری ءِ کار ءِ تہ ءَ کمو وھد ءُ پاسی جوڑی کنگ ءِ واستہ ٹیکنالوجی ءِ کارمردی کنگ بوھگ ءَ انت۔ تانکہ وام آنی زوروکیں مردم آنی ڈاکیومنٹس آنی ویریفیکیشن زوتی ءَ گوں کنگ بہ بیت۔ مزن وزیر ءَ را سرپد کنگ بوتگ کہ استیں جند بینک ھم وام آنی پجاری بندات کنت۔ مزن وزیر ءَ گوشت کہ گریبیں مردم آناں بینک آں چہ وام آنی زورگ ءِ ساھت ءَ ھمک رنگیں آسانی پجاری کنگ بیت۔ چیف سیکرٹری پنجاپ ءَ دیوان ءَ را گوشت کہ جوڑیشتکار ءُ بلڈرز آنی واستہ آن لائن پورٹل ءِ بنگیج کنگ بوتگ ایشی ءِ رد ءَ انوگ ءَ تاں 6994 دزبندی جم بوتگ ءُ ایشانی تہ ءَ 54 درسد ءِ منظوری دیگ بوتگ۔ دیوان ءَ را سرپد کنگ بوتگ کہ سیادی داروکیں ادارگ آناں آن لائن پورٹل ءَ گوں بندوک کنگ بوتگ تانکہ منظوری ءِ کار ءِ تہ ءَ اچ وڑیں مھتلی مہ بیت۔ ھمک منظوری ءِ کار گیشینتگیں وھد ءُ پاس ءِ پابند بیت ءُ دزبندی کنوک وتی کیس ءِ بابت ءَ موبائل ایپ ءِ وسیلگ ءَ سرپد ءُ سئیگ بنت۔ مزن وزیر ءَ توامیں صوبگ آناں پنت ءُ شون کت کہ آن لائن پورٹل ءِ گیشاں چہ گیش کارمردی ءَ بکن انت تانکہ منظوری ءِ کار ءَ را سرجمیں رنگ ءَ ساپ ءُ سلہ ءُ زوتی ءَ گوں ھلاس کنگ بہ بیت۔ حکومت ءِ گریبیں الس آنی واستہ ہائوسنگ پالیشی ءَ را ساڑاھان ءَ بنجاھی وزیر اھوالکاری ءُ شنگ کاری سینیٹر شبلی فراز ءَ گوشت کہ چاگرد ءِ گریبیں ءُ بزگیں مردم آنی گہبود مزن وزیر عمران خان ءِ اولی ترجی داتگیں کار آنی تہ ءَ ھوار انت۔ جوڑیشتی صنعت ءِ واستہ بے دروریں ءُ جوانیں آسراتی پیکیج وھد ءُ موہ ءِ سر ءَ گامگیج انت ایشی ءَ چہ 40 ءَ چہ گیش نزیکیں صنعت سیت مند بنت۔ آئی ءَ ہائوسنگ ءِ شوبگ ءِ بابت ءَ حکومت ءِ دل یکیمی ءِ درشان ءَ کنان ءَ گوشت کہ ہائوسنگ ءِ شوبگ ءَ پینگ آناں زوتی ءَ گوں ساپ کنگ ءِ واستہ راجی رابطہ کمیٹی جوڑ کنگ بوتگ۔ بنجاھیو زیر ءَ گوشت کہ مئے سیم سر اولی بھر ءَ یک لکھ گس آنی جوڑیشت انت۔ آئی ء۔گ وشت کہ کمرشل بینک آناں پنت ءُ شون کنگ بوتگ کہ آ جوڑیشتی صنعت ء، واستہ وتی وام آنی پورٹ فولیو ءِ پنچ درسد بہگیشین انت ایشی ءَ چہ 30 ارب کلدار ءَ چہ گیش یکجاہ بنت وھدیکہ حکومت گریبیں الس ءَ را 130 ارب کلدار ءِ سبسڈی ھم پجاری کنگ ءَ انت۔
