اسلام آباد۔4نومبر (اے پی پی): مزن وزیر عمران خان ءُ بوسنیا ہرزیگووینا ءِ پریذیڈنسی ءِ چیئرمین شفیق جعفر ووچ ءِ نیام ءَ دو پہ دوئی ءَ گندءُ نند چارشمبے ءِ روچءَ بوتگ۔ گندءُنندءَدونیمگی سیادی ءِ سرءَ ھیال ءُ لیکہ ءِ درشانی کنگ بوتگ ء ُ درائیں پڑ حاس معیشت، بیپار ، زرکاری ، سائنس و ٹیکنالوجی ، دیمپانی صنعت ءُ وانگ ءُ زانگ ءُ دود ءُ ربیدگ ءَ دونیمگی کمک ءَ را گیش کنگ ءِ سرءَ تپاک کنگ بوتگ۔ مزن وزیر میڈیا کارگس ءِ ردءَ دوئیں راہشونانی نیام ءَ گندءُنندءَ مزن وزیر عمران خان ءَ بوسنیا ہرزیگووینا ءِ پریذیڈنسی ءِ چیئرمین شفیق جعفر ووچ ءَ را وش اَتک کتگءُ گشتگ کہ پاکستان ءِ بوسنیا ہرزیگووینا ءِ گوما براتیں سیادی اَست اِنت۔ آئی ءَ گشتگ کہ 2005 ءِ زمین ءُ 2010ءِ ہور ہار ءِ موہ ءَ بوسنیا ہرزیگووینا ءِ کمک ءَ را پاکستان شرپ ء ُ ارزشت دنت۔ مزن وزیر ءَ کوویڈ۔19 ءِ حلاپ ءَ سمارٹ لاک ڈاؤن ءِ حکمت عملی ءِ ردءَ جوانیں کوشست ءُمردمانی زند رکینگ ءَ ہوار معاشی رکینگ ءُ معیشت ءَ تینزی آرگ ءِہوالگ ءَ کتگیں گامگیج پدر کتگ اَنت۔ گندءُنندءَ بوسنیا ہرزیگووینا ءِپریذیڈنسی ءِ چیئرمین ءَ پاکستان ءُ بوسنیا ہرزیگووینا ءِ نیام ءَ نزیکیں براتیں سیادی ءَ را پدر کتگ۔ دوہیں راہشوناں دونیمگی سیادی ءِ سرءَ ھیال ءُ لیکہ ءِدرشانی کتگ ءُ درائیں پڑ حاس معیشت، بیپار، زرکاری، سائنس ءُ ٹیکنالوجی ، دیمپانی صنعت ءُ وانگ ءُ زانگ ءُ دودءُربیدگ ءَ دونیمگی کمک ءَ را گیش کنگ ءِ سرءَ تپاک کتگ۔ گندءُنندءَدونیمگ ءَ یکے دومی ءِ گور ءَ ڈل دیم دیئگ ءِ سرءَ تپاک کتگ۔ مزن وزیر ءَ آئی ءَ گشتگ کہ بھارتی غیر قانودی مقبوضہ جموں و کشمیر ءَ انسانی حقانی حلاپ ورزی ءُ 5 اگست 2019 ءَ بھارت ءِ یک نیمگی غیر قانودی گامگیج ءِ اثر ءَ ہوار خطہ ءِ امن ءُ سلامتی ءَ را استیں ھترہ ءِہوالگ ء َ سرپد کتگ۔ آئی ءَ بوسنیا ہرزیگووینا ءِ نیمگ ءَ چہ کشمیر ءِ سرءِ جیڑہ ءِ سرءَ اُصولی گپ کنگ ءَ آئی ءِ شکرءُ منت گپتگ۔ ایشی ءَ ابید آئی ءَ گشتگ کہ دنیا ءَ را مے نبی حضرت محمدؐ ءِ ہوالگ ءَ مسلمان آنی جزبگ زانگ لوٹاں۔ آئی ءَ گشتگ کہ پاکستان یورپ ءَ بوتگیں ناشرکاری ءِ اُرش ءَ ایر جنت، دنیا ءَ ہمک مذہب ءِ شرپ ءُ عزت کنگ المی اِنت۔ ایشی ءَ ابید آیاں ایڈمیشن ایگریمنٹ ءِ سرءَ دستخط کتگ۔ بوسنیا ہرزیگووینا ءِ پریذیڈنسی ءِ چیئرمین ءَ مزن وزیر عمران خان ءَ را بوسنیا ہرزیگووینا ءِ ترءُتاب کنگءِ دعوت داتگ کہ آئی ءَ قبول کتگ۔ ایشی ءَ پیسر دوئیں ملک آنی نیام ءَ ڈلی تک ءَ سول ءُ تران بوتگ۔ دوئیں نیمگ ءَ وزیر ءُ سینئر ایڈوائز ڈل ءَ ہوار بوتگ اَنت۔
