پاکستان، بوسنیا تون چندی بشخ آتیٹی ہڑتوم آ کنڈآتا کمکاری ءِ مون آ دننگ نا خواہندار ءِ، وزیر خارجہ

اسلام آباد۔ 04 نومبر (اے پی پی) وزیر خارجہ مخدوم شاہ محمود قریشی پارینے کہ پاکستان، بوسنیا تون ہڑتوم آ کنڈآتا واپار، اقتصادیات،تعلیم، دودوربیدگ و السی رابطہ غاتون اوار چندی بشخ آتیٹی کمکاری ءِ مون آ دننگ نا خواہندار ءِ۔ داہیت ءِ او چارشنبے نادے آ پاکستان نا اِرادے ئی دورہ آ بروک آ بوسنیا، ہرزیگووینا نا پریذیڈنسی نا چیئرمین شفیق جعفر ووچ اتون اوڑدہی ٹی پارے۔ اوڑدہی ٹی ہڑتوم آ کنڈآتا تعلقداری، ڈیہہ نا حالیت آتون اوار تین پہ تینی است خواہی نا باندات آتیا گپ وتران کننگا۔ وزیر خارجہ شاہ محمود قریشی پارے کہ پاکستان نا بوسنیا، ہرزیگوویناتون خوشگوار برادرانہ تعلقداری ءِ۔ ہڑتوم آ ملک آک گرج انا ہر ساہت اٹ اسہ ایلو نا کمک ءِ کریر۔ بوسنیا نا صدر پارے کہ پاکستان بوسنیا ٹی جنگ اٹی اقوام متحدہ نا امن دستہ غاتیٹی نمان وڑاٹ بشخ ہلک ہراڑآ ای نما بھاز منت وار اُٹ۔ وزیر خارجہ پارے کہ پاکستانی الس، 2005ء نا زمی جمب و 2010 انا نوکاپ اٹی بوسنیا ہرزیگووینا نا کنڈآن تروک آ کمک ءِ اسُل است آن دپنہ۔ پاکستان، بوسنیا تون ہڑتوم آ کنڈآتا واپار، اقتصادیات، تعلیم، دودوربیدگ و السی رابطہ غاتون اوار چندی بشخ آتیٹی کمکاری ءِ مون آ دننگ نا خواہندار ءِ۔ ہڑتوم آ ملک آتا نیام اٹ بڑزکو کہولی ڈل آتا ہن و بر آن ہڑتوم آ کنڈآتا تعلقداریک پین سوگو مریرہ۔ وزیر خارجہ، بوسنیا نا صدر ءِ بھارت نا کنڈآن مقبوضہ جموں و کشمیر اٹی برجا انسانی حق انا بھلا خلاف ورزی تیان معلومدار کرسا مقبوضہ کشمیر نا بابت اونا بیان نا ستاءِ کرے و پارے کہ مقبوضہ جموں و کشمیر اٹی بھارت نا کنڈآن انسانی حق انا بھلا خلاف ورزی تا چرجوئی برجاءِ۔ کشمیری تے بھارتی گھیڑ و جور آن نجات ترفنگ کن بوسنیا تون اوار جہانی برادری ءِ مون آ برسا تینا کڑد ءِ ادا کننگ نا گرج ءِ۔ بوسنیا نا صدر پارے کہ نن سمجھنہ کہ انسانی حق انا شرف ءِ مرکزی حیثیت تننگے ہنداخاطرآن نن کشمیر نا بابت تینا بیان اٹی زور شاغان کہ مقبوضہ جموں و کشمیر اٹی انسانی حق انا شرف ءِ کننگے و کشمیر نا ویل ءِ اقوام متحدہ سلامتی کونسل نا قرارداد آتے مون آ تخسا پرامن وڑاٹ ایسر کننگے۔ صدر بوسنیا پارے کہ کنے پاکستان آ برسا، نیتون ملسا و گپ وتران کرسا بھاز خوشی محسوس مننگ ءِ۔ پاکستان و بوسنیا نا نیام اٹ گہرا رابطہ ءِ دا دورہ ٹی ننے تین پہ تینی تعلقداری تے مون آ دننگ اٹ کمک رسینگک۔ کڑدہ غاک تین پہ تینی است خواہی نا باندات ہڑتوم آ کنڈآتا کمکاری ءِ مون آ دننگ آ امنا کریر۔ وزیر خارجہ اوغانستان اٹی قیام امن کن پاکستان نا خیر خواہی کڑد انا بابت بوسنیا نا صدر ءِ معلومدار کرسا ڈیہہ ٹی امن کن تینا خیرخواہی کڑد ءِ ادا کننگ نا عزم انا درشانی ءِ کرے۔