اسلام آباد۔ 04 نومبر (اے پی پی) صدر مملکت ڈاکٹر عارف علوی پارینے کہ پاکستان نیپال تون تینا تعلقداری تے خاص اہمیت ایتک، ہڑتوم آ ملک آتا زرگزرانی، سیاسی و دودوربیدہ ئی تعلقداری ٹی پین گچین نا لائخی ساڑی ءِ، پندار سفیر بھارت اٹی مسلمان و ایلو اقلیت آتا برخلاف کروک آ گام گیج آتے جہانی کہول آ ہرفے۔ داخیال آتا درشانی ءِ او نیپال اٹی تعینات پاکستان نا سفیر سید حیدر شاہ تون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ صدر مملکت پارے کہ پاکستان نیپال تون تینا تعلقداری تے خاص اہمیت ایتک۔ پاکستان تین پہ تینی فائدہ نا غٹ بشخ آتیٹی نیپال تون ہڑتوم آ کنڈآتا تعلقداری تے پین ودفنگ و سوگوی تننگ نا خواہندار ءِ۔ اوپارے کہ پاکستان و نیپال نا زرگزرانی، سیاسی و دودوربیدہ ئی تعلقداری ٹی پین گچین نا لائخی ساڑی ءِ۔ پاکستان و نیپال نا نیام اٹ کشت وکشار، دواسازی، آئی ٹی، ٹیکسٹائل و سرجیکل ازباب کون آ بشخ آتیٹی کمکاری ءِ ودفنگ نا گرج ءِ۔ صدر عارف علوی پارے کہ اومیت ءِ کہ پوسکن آ سفیر ہڑتوم آ ملک آتا نیام اٹ زرگزرانی و دودوربیدہ ئی تعلقداری تے پین سوگو کننگ کن فعال کڑد ادا کیک۔ پندار سفیر مقبوضہ جموں و کشمیر اٹی انسانی حق انا لتاڑ تیا بھارت ءِ بے نقاب کننگ نا کوشست کے۔ اوپارے کہ پندار سفیر بھارت اٹی مسلمان و ایلو اقلیت آتا برخلاف کروک آ گام گیج آتے جہانی کہول آ ہرفے۔
