اسلام آباد۔ 04 نومبر (اے پی پی) قومی احتساب بیورو (نیب) انا چیئرمین جسٹس(ر) جاوید اقبال پارینے کہ ملکی زرگزرانی شونداری ٹی بزنس کمیونٹی نا اہم کڑد ءِ، نیب بزنس کمیونٹی نا انکم خراج و سیلز خراج نا بابت کیس آتے ایف بی آر آ گدریفینے وخت اس کہ بزنس کمیونٹی نا ویل آتے کانود نا رداٹ ایسر کننگ و اوفتے آسراتی فراوان کننگ کن خصوصی ڈیسک اس جوڑ کننگانے۔ داخیال آتا درشانی ءِ او صدر گوادر چیمبر آف کامرس بلوچستان میر نوید بلوچ تون نیب ہیڈکوارٹر اٹی اوڑدہی ٹی گپ وتران کرسا کرے۔ چیئرمین نیب پارے کہ نیب بزنسن کمیونٹی نا بھاز شرف ءِ کیک انتئے کہ او ملک انا اقتصادی شونداری ٹی اہم کڑد ادا کننگ ءُ۔ نیب بزنسن کمیونٹی نا انکم خراج و سیلز خراج نا بابت کیس آتے ایف بی آر آ گدریفینے وخت اس کہ بزنس کمیونٹی نا ویل آتے کانود نارداٹ ایسر کننگ و اوفتے آسراتی فراوان کننگ کن نیب ہیڈکوارٹرز و علاقائی بیورو تیٹی خصوصی ڈیسک جوڑ کننگانے، دا خصوصی ڈیسک آتے پورویاگر برادری نا غاو تے کانود نارداٹ سرتننگ نا پارت کننگانے۔ اوپارے کہ ملک 100 ارب روپئی آن زیات نا وامدار ءِ، ہسپتال آتیٹی کٹ اف، یونیورسٹی و کالج آتیٹی طالب علم آتے داخلہ ملپننگ ءِ و ملک انا زرگزرانی حالیت خراب ءِ۔ اوپارے کہ 1980 نا دہائی ٹی ہرامخلوق تون ہچ اس الوکہ او اینو بھلا بھلا ماڑی تا خواجہ ءُ، نیب جاست وپاست کننگ ءِ کہ اوفک دا پیسہ غاتے ہراکان دوئی کریر و موٹرسائیکل نا مالک دبئی ٹی ٹاورزو بھلو زراسے نا خواجہ امر مس۔ اوپارے کہ نیب اوفتا برخلاف کانود نا رداٹ کارروائی کننگ ءِ ہرا حکومت اٹ رہینگر و مستین اٹ اوفتیان ہچ کس ہریفنگ کپک، نن اوفتیان غیر کانودی گام گیج، واکداری تا ناروا کاریم اٹ اتنگ، کٹیا آن زیات میرات، منی لانڈرنگ و قومی خزانہ ءِ نسخان تننگ نا بارواٹ سوج کننگ اُن۔ اوپارے کہ نیب طاقت ور شخصیت و بھلا مچھی تے کانود نا رداٹ اتنگ تون اوار اوار راج آن وڈی خوری نا چٹفنگ کن پبی کوشست کننگ ءِ۔ نیب بینک نادہندگی کیس اٹی براہ راست کارروائی کننگ کپک ولے اسٹیٹ بینک پوریا گر آتا برخلاف نادہندہ مننگ نا سوب نیک ءِ کیس ءِ ریفر کیک۔ اوپارے کہ وائٹ کالر کرائم نا جاست وپاست چیلنجنگ ٹاسک اسے انتئے کہ ڈوہ اسہ شار اٹی کننگک وخت اس کہ ملکیت آک پین ملک اسے ٹی مریرہ ولے نیب آفیسر آک ملک آن وڈی خوری نا چٹفنگ ءِ قومی فرض تکسا ادا کننگ ءُ۔ جعلی ہاؤسنگ سوسائٹی تیا تنقید کرسا اوپارے کہ غیر کانودی ہاؤسنگ سوسائٹیک، ڈغار اسے نا یا چنکو ڈغار اس دوئی کرسا نیزگار شاری تے ہنین ءُ تغ نشان ترسا پُلنگ ءُ۔ اوپارے کہ نیب گوادر انڈسٹریل اسٹیٹ ڈویلپمنٹ اتھارٹی نا کنڈآن صنعتی و کمرشل پلاٹ آتا مبینہ غیر کانودی الاٹمنٹ اٹ بے وڑی و مبینہ وڈی خوری نا نوٹس ہلکونے۔
