اسلام آباد۔ 04 نومبر (اے پی پی) جہانی بینک انا رپورٹ نا رداٹ اینخو سال 2020ء ٹی پاکستان اٹی زررادہ کننگ نا وصولی تیٹی 9 درسد ودکی نا گمان ءِ۔ اینخو سال انا ایسر اسکان زررادہ کننگ نا مد اٹی پاکستان ءِ جم وڑاٹ 24 ارب ڈالر ملنگ نا گمان ءِ۔ جہانی بینک انا ’’مائیگریشن اینڈ ڈویلپمنٹ بریف‘‘ رپورٹ نا رداٹ اینخو سال 2020 اٹی سویلی ایشیا نا ملک آتے زر رادہ کننگ نا وصولی تیٹی 4 درسد وخت اس کہ سال 2021ء ٹی 11 درسد اسکان نا کمتی نا گڑتی ءِ۔ جہانی بینک انا انسانی وسیلہ نا شونداری نا بشخ انا نائب صدر و مائیگریشن سٹیئرنگ پڑک نا چیئرپرسن ممتامر تھی پارینے کہ کوویڈ۔ 19 نا جہانی دین انا سوب و نیامئی کٹیا کروک آ ملک آتے زررادہ کننگ نا وصولی تیٹی کمتی نا گڑتی ءِ و داڑآن دا ملک آتیٹی رہینگوک آ ہندن ءُ خاہوت ہرافتا سیبو زررادہ کننگ آٹے، اوفتا باندات آک زہمی مننگ کیرہ۔ جہانی بینک انا رپورٹ نا رداٹ سال 2020ء ٹی کم و متوسط کٹیا کروک آ ملک آتا ترسیلات زر انا وصولی 7 درسد نا کمتی آن 508 ارب ڈالر اسکان کم مننگ وخت اس کہ سال 2021ء ٹی پین 7.5 درسد کمتی نا سوب 470 ارب ڈالر اسکان کم مننگ نا گڑتی ءِ ولے ورلڈ بینک تینا رپورٹ اٹی گمان ظاہر کرینے کہ اینخو سال 2020ء ٹی پاکستان نا ترسیلات زر انا وصولی 9 درسد ودکی آن 24 ارب ڈالر اسکان ودنگ نا گمان ءِ۔
