اسلام آباد۔3نومبر (اے پی پی): مزن وزیر ءِ مشیر برائے ھزانگ ڈاکٹر عبدالحفیظ شیخ ءَ گشت کہ راجی معیشت دیمروئی ءِ کشک ءَ واتر انت، گوستگیں چار ماہ ءِ ساھت ءَ ملکی وام آنی تہءَ اچ گیشی نہ بوتگ۔ سئے شمبے ءَ مزن وزیر عمران خان ءِ ھمبراھی ءَ صنعت ءِ بابت ءَ ھاٹیگ ریلیف پیکیج ءِ سر ءَ بریفنگ ءِ ساھت ءَ آئی ءَ گوشت کہ 30 جون ءَ چہ یکم نومبر ءَ تاں ملکی وام آنی تہ ءَ اچ رنگیں گیشی نہ بوتگ۔ ڈاکٹر عبدالحفیظ شیخ ءَ گوشت کہ اے کامیاتی ملک ءَ را وتی آمدنی ءِ گیش بوھگ ءِ پد ءَ رستگ انت، حکومت ءَ ھرچ ءُ درچ آنی تہ ءَ کمی کتگ وھدیکہ امبار آنی تہ ءَ گیشی بوتگ۔ آئی ءَ گوشت کہ حکومت کوویڈ-19 ھوپ ءَ چہ کامیاتی ءَ گوں گر ءُ داری بوتگ ءُ ملک ءَ را مشکلیں جاور ھال آں چہ ڈن کشتگ، اے وھد ءَ گیشتریں اقتصادی ٹک پازیٹو سہرا کنگ ءَ آں۔ آئی ءَ گوشت کہ ریونیو ءُ برآمدی پڑے تہ ءَ گیشی بوتگ ءُ صنعت ھم پازیٹو دیمروئی کنگ ءَ انت، استیں وھد ءَ کرنٹ اکائونٹ تاوان 20 ڈالر ءَ چہ کم بوھان ءَ زیرو ءِ سر ءَ اتکگ۔ آئی ءَ گوشت کہ پاکستان سٹاک ایکسچین ءَ جوانیں کار کرد پیش داشتگ ایش دگنیا ءِ چارمی مستریں مارکیٹ انت ءُ ایشیا ءِ گہتریں کار کرد ءَ را پیش داروکیں مارکیٹ آنی تہ ءَ اولی مارکیٹ انت۔ آئی ءَ گوشت کہ کم کٹ کنوکیں مردم آناں شیلٹر پجاری کنگ ءِ واستہ حکومت ءَ کسانیں گس آنی جوڑیشت ءِ واستہ 90 درسد ٹیکس ریلیف داتگ۔ آئی ءَ گوشت کہ سرکاری شوبگ ءِ دیمروئی پروگرام ءِ چیر دستی ءَ کم دیمروئی کنوکیں دمگ آنی واستہ بازیں فنڈ گیشینگ بوتگ ءُ یوٹیلیٹی سٹور آنی وسیلگ ءَ پنچ بنیاتی سامان آنی سر ءَ سبسڈی دیگ بوتگ۔ فاٹا ءِ دمگ آنی دیمروئی ءِ واستہ 152 ارب کلدار ءِ ٹوھیں پیکیج ءِ داتگ۔
