اسپیکر قومی اسمبلی اسد قیصر نا لیڈی ریڈنگ ہسپتال نادورہ، مسیت دھماکہ ٹی ٹھپی طالب علم آتا جان پڑسی ءِ کرے

اسلام آباد۔ 03 نومبر (اے پی پی) اسپیکر قومی اسمبلی اسد قیصر سے شنبے نادے آ پشاور اٹی لیڈی ریڈنگ ہسپتال اٹی مسیت دھماکہ ٹی ٹھپی مروک آ طالب علم آتا جان پڑسی ءِ کرے۔ داوخت آ اسپیکر پارے کہ منہ دے آن ارادہ ئس، اینو پشاور آ بسٹ تو ٹھپی مروک آتا جان پڑسی ءِ کریٹ۔ واقعہ نا اخس مذمت ءِ کننگے کم ءِ۔ افسوز ءِ کہ مدرسہ غاتیا دہشت گردی مریک، اسد قیصر پارے کہ درو کابل اٹی ہم بھلو واقعہ اس مسنے اونا مذمت ءِ کینہ۔ قوم قربانی تسنے، دا شار و صوبہ بھاز زہمی مسنے۔ ساڑی آ واقعہ غاک است ہسونی نا سوب ءُ اوپارے کہ دااوغان امن عمل ءِ لتاڑنگ نا کوشست اسے۔ پاکستان و اوغانستان نا الس نا نیام اٹ پوسکن ءُ کنٹریکٹ اس مننگ ءِ۔ پاکستانی و اوغان الس امن نا کنڈآ ہِننگ خوارہ۔ دہشت گردی نا برخلاف ننا قوم قربانی تسنے۔ اے این پی تون اوار ایلو پارٹیک قربانی تسنو، اسد قیصر پارے کہ دا قربانیک قوم اکن ئسر۔ ملک دشمن پاکستان و اوغان الس ءِ جنگ ترفنگ خوارہ۔ ہڑتوم آ ملک آتا الس امن خوارہ۔ عبداللہ عبداللہ سی پیک ءِ اوغانستان اسکان ودفنگ آ راضی ءِ۔ حکومت تینا ہیت ءِ کیک اپوزیشن تینا ہیت ءِ کیک۔