اسلام آباد۔ 03 نومبر (اے پی پی) ڈپٹی اسپیکر قومی اسمبلی قاسم خان سوری پارینے کہ پیشن نا ملک رہینگوک آ پاکستانیک ملک انا سفیر ءُ و ملک انا شونداری و شونہالی ٹی اوفتا کڑد بھاز اہمیت تخک۔ اوپارے کہ ساڑی حکومت سمندر پار پاکستانی تا خذمت آتے قدر انا نظر اٹ ہرک و پاکستان اٹی اوفتے ہروڑنا آسراتی فراوان کننگ کن سنبرینگوک ءِ۔ اوداخیال آتا درشانی ءِ پاکستان تحریک انصاف فرانس نا صدر ذوالفقار جیتالا تون گپ وتران کرسا کرے ہرا سے شنبے نادے آ پارلیمنٹ ہاؤس اٹی ڈپٹی اسپیکر تون اوڑدہی کرے۔ داوخت آ پاکستان تحریک انصاف نا مرکزی حوالکاری احمد جواد ہم ساڑی ئس۔ ذوالفقار جیتالا ساڑی حکومت نا کنڈآن کورونا دین انا توننگ کن تینا کروک آ حکمت عملی و وخت آ گام گیج آتا ستاءِ کرے۔ اوپارے کہ فرانس و ایلو شون ہلوک آ ملک آک ہراڑے پوسکن آ طبی آسراتی و وسیلہ ساڑی ءِ داتم اسکان دا ہلوک آ ناجوڑی نا مون ءِ توننگ اٹ بے سہب ءُ و دا ملک آتیٹی لکھ آ بندغ دا ہلوک آ مرض انا گواچی مسنو۔ اوڈپٹی اسپیکر ءِ پیشن نا ملک رہینگوک آ پاکستانی تے پارلیمنٹ اٹ نمائندگی ترفنگ کن پارے۔ اوڈپٹی اسپیکر نا منت واری ءِ ہرفسا ساڑی حکومت نا پالیسی تیا پت انا درشانی ءِ کرے و تینا ہروڑنا کمکاری نا باوری کرفے۔ ڈپٹی اسپیکر پارے کہ ساڑی حکومت مچ آ دنیا ٹی رہینگوک آ پاکستانی پردیسی تتون سلوک ءِ و اوفتے مون تروک ویل آتے ایسر کننگ کن اولیتی بنداو تیا گام گیج کننگ ءِ۔ اوباوری کرفے کہ او پیشن نا ملک رہینگوک آ پاکستانی تے پارلیمنٹ اٹ نمائندگی ترفنگ کن تعلقدار فورم تیا ہیت کیک۔
