اسلام آباد۔2نومبر (اے پی پی)بلوچستان عوامی پارٹی ءِ سینئر باسک بانک مینا بلوچ ءَ گشتگ کہ چہ روزگار ءَ درکتگیں راہ دربرانی گپ ءُ جیڑہ آں بلوچستان ءِ سروزیر ءَ سرکناں ، اگاں گوں آیاں ناانصافی کنگ بوتگ گڈا نوں آ موکگ بنت ءُ آیانی جیڑہ گیشءُ گیوار بیت ۔ آئی ءَ گشتگ کہ آیاں چہ روزگارءَ درکنگ ءِ ھاترءَ قانودی لوٹ پیلو کنگ نابوتگ اَنت۔ اے ھیال ءُ لیکہ آنی درشانی بانک مینا مجید ءَ نوکری ءَ درکتگیں ٹیچرز آنی ڈلے ءَ گوں گندءُنند کنان ءَ کتگ۔گند ءُ نند ءَ بانک مینا مجید ءَ زالبول ٹیچرز آناں اوست داتگ کہ آیانی گپ ءُ جیڑہ بلوچستان ءِ سروزیر جام کمال ءَ را سرکنگ بنت۔ آئی ءَگشتگ کہ ٹیچرز ملک ءِ باندات انت، یک نسلےءَ راتیار کنگ ءِ ھاترءَ ٹیچرآنی کرد باز ارزشت داریت۔ آئی ءَگشتگ کہ مے حکومت ءَ دائم ءَبلوچستان ءُ ملک ءِھاترءَ پائدگ ءِ فیصلہ کتگ، پہ بلوچستان ءِباندات ءُ پائدگ ءِھاترءَ فیصلہ کنگ بنت ءُ فیصلہ آنی سرءَ عمل درآمد کنگ بیت۔ من اُمیت کناں کہ بلوچستان ءِ سروزیر اے جیڑہ ءَ را گیشءُ گیوار کنگ ءِ ھاترءَ گامگیج چست کنت۔ آئی ءَ گشتگ کہ ایم پی اے حاجی اکبر آسکانی 114 ٹیچرآنی بحالی ءِ ھاترءَ باز کوشست کتگ کہ آئی ءِ کوشست لکھ کرز اَنت، آئی ءَ را گشتگ کہ تنا گوشتانک ءُ تقریر ءَ چہ مردمانی جیڑہ گیش ء ُ گیوار نابنت بلکیں اُلس ءِ ھاترءَ کنگ ءُ پیش دارگ لوٹ ایت انچو کہ ما پہ ہمے ٹیچرآنی ھاترءَ سکیں سردی ءَ رہائش ءَ ہوار وردن ءُ وراک ءُ ایندگہ ضلورتانی ھاترءَ وتی جیب ءَ حرچ کنگ ءُ آیانی کمک ءَ کنگءَ اَنت، من ءَ اُمیت اِنت اے ٹیچرآنی جیڑہ زوت گیشءُ گیوار بیت۔
