اسلام آباد۔ 02 نومبر (اے پی پی) وزیر خارجہ مخدوم شاہ محمود قریشی پارینے کہ پاکستان، اوغان امن عمل تون اوار ڈیہہ ٹی امن کن خلوص نیت اٹ خیرخواہی نا کوشست آتے کاریم اٹ اتنگ ءِ۔ داہیت ءِ او دوشنبے نادے آ فن لینڈ انا تینا ہم منصب پیکاہاوسٹوتون ٹیل فون آ رابطہ ٹی پارے۔ ٹیل فون آ گپ وتران اٹی اوغان امن عمل تون اوار ڈیہہ ٹی امن و ایمنی نا حالیت آتا بابت سرجم گپ وتران کننگا۔ پاکستان، اوغان امن عمل تون اوار ڈیہہ ٹی امن کن خلوص نیت اٹ خیرخواہی نا کوشست آتے کاریم اٹ اتنگ ءِ۔ اوپارے کہ وزیراعظم عمران خان اولیکو دے آن پارسا بننگ ءِ کہ اوغان ویل انا اسٹ انگا ایسر، اوغان سرکڑدہ غاتیٹی اوغان تے قابل قبول مذاکرات ءِ۔ شاہ محمودقریشی پارے کہ دوحہ ٹی بین الاوغان مذاکرات نا اڈتننگ، اوغانستان اٹی امن کن بے کچ ستاکڑزوک پیش رفت اسے اوغان سرکڑدہ غاک دا روشنا موقع غان فائدہ ہرفسا دا مذاکرات ءِ ایسر اسکان سرکیر۔ وزیر خارجہ اوغان راہشون عبداللہ عبداللہ، گلبدین حکمت یار و اوغان ویلوسی جرگہ نا دورہ پاکستان و اوفتے تون مروک آ مثبت گپ وتران نا بابت فن لینڈ انا وزیر خارجہ ءِ معلومدار کرے۔ وزیر خارجہ ہندا تُو انا ایسر آ، جنیوا ٹی، فن لینڈ، اقوام متحدہ و اوغانستان نا تین پہ تینی شریداری اٹ اڈ ہلوک آ کانفرنس ءِ ستاکڑزوک گوندسا ، اودے اوغانستان اٹ دیرپا امن و سوگوی کن اہم گوندا۔ وزیر خارجہ اوغانستان نا بابت جنیوا ٹی اڈ ہلوک آ کانفرنس اٹ بشخ ہلنگ کن بٹنگ انگ آ فن لینڈ انا وزیر خارجہ نا منت واری ءِ ہرفے، شاہ محمود قریشی اومیت ظاہر کرے کہ کانفرنس اٹی اوغان باہوٹ آتا باعزت وطن آ پدی ہِننگ نا بابت لائحہ آ ہم شرہ کننگک۔ ہڑتوم آ وزیر خارجہ غاک اوغان امن عمل تون اوار ڈیہہ ٹی امن و سوگوی کن تین پہ تینی سلابتی چرجوئی ءِ برجاتخنگ آ امنا کریر۔
