اسلام آباد۔ 02 نومبر (اے پی پی) ڈپٹی اسپیکر قومی اسمبلی قاسم خان سوری تون بنجائی وزیر دفاعی پیداوار زبیدہ جلال دوشنبے نادے آ پارلیمنٹ ہاؤس اٹی اوڑدہی کرے۔ اوڑدہی ٹی بلوچستان اٹی برجا شونداری ڈٹ، صوبہ نا الس ءِ مون تروک ویل و ملک انا جم سیاسی و زرگزرانی حالیت آتیا گپ وتران کننگا۔ داوخت آ گپ وتران کرسا ڈپٹی اسپیکر پارے کہ بلوچستان قدرتی وسیلہ غاتیان شپ ءِ ولے مستین اٹ دا صوبہ ءِ گوجالنگسا ہنا و صوبہ نا الس نا ویل آتیا ہچ ءُ چکار اس کننگتو ہرانا سوب آن صوبہ نا الس احساس محرومی نا گواچی ءُ۔ اوساڑی حکومت نا کنڈآن بلوچستان نا شونداری کن کروک آ گام گیج آتا ستاءِ کرسا پارے کہ وزیراعظم عمران خان بلوچستان نا شونداری ٹی خصوصی است خواہی تخک و اونا پارت آ صوبہ ٹی کیہی میگاشونداری ڈٹ آتیا کاریم برجاءِ۔ اوداپت انا درشانی ءِ کرے کہ دا ڈٹ آتا پوروی آن صوبہ ٹی شونداری و شونہالی نا اسہ پوسکن ءُ دور اس بناکیک و صوبہ نا الس اٹ مروک آ احساس محرومی چٹک۔ اوبلوچستان نا شونداری و شونہالی کن بنجائی وزیر دفاعی پیداوار نا کوشست آتا ہم ستاءِ کرے۔ بنجائی وزیر دفاعی پیداوار زبیدہ جلال بلوچستان نا شونداری کن ڈپٹی اسپیکر نا است خواہی نا ستاءِ کرسا اودے صوبہ ٹی برجا شونداری ڈٹ آتیا مروک آ کاریم نا سرجم آتیان معلومدار کرے۔ اوپارے کہ ساڑی آ بجٹ اٹی بلوچستان نا شونداری و شونہالی کن بھلو فنڈ اس جتا کننگانے و بنجائی حکومت صوبائی حکومت تون اواری اٹ بلوچستان اٹ الس ءِ بنداوی آسراتی تا فراوانی کن کوشست کننگ ءِ۔ اوپارے کہ صوبہ ٹی چین پاکستان اقتصادی راہداری نا رداٹ دا وخت آ کیہی ڈٹ آتیا کاریم برجاءِ ہرافتا پوروی آن صوبہ ٹی روزگار نا پوسکن ءُ وارخواہی ودی مریک و الس نا زند انا آب بڑزمریک۔ اوڈپٹی اسپیکر ءِ باوری کرفے کہ بلوچستان نا الس ءِ اوفتا حق ترفنگ و صوبہ نا شونداری و شونہالی ءِ پک کننگ کن ہچ ءُ دقیقہ فروغ گذاشت اس کننگپک۔ اوڑدہی ٹی وزیراعظم پاکستان نا ہنداتُو اٹی گمانی دورہ قطبی بلوچستان ہراٹی او قطبی بلوچستان نا شونداری و شونہالی کن شونداری پیکج نا پڑو ءِ کیک، آ ہم گپ وتران مس و دانا بست وبند آتا جاچ ءِ ہلنگا۔
