اسلام آباد۔ 02 نومبر (اے پی پی) قومی ایئر لائن(پی آئی اے) وزارت خزانہ، نیشنل بینک، اسٹیٹ بینک ، ریجنل ایکوپمنٹ مینو فیکچرر و انٹرنیشنل ایئر ٹرانسپورٹ ایسوسی ایشن (ایاٹا) نا سلابت اٹ پنچ سالہ کاروباری پلان 2019-20آ عمل کننگ ءِ۔ قومی ایئر لائن نا کمامدارآک اے پی پی ءِ پاریر کہ دا کاروباری پلان نا مسخت پرچم بردار جہانی ایئر لائن نا عظمت رفتہ ءِ بحال کننگ نا ءِ ہراڑکن وزیراعظم نا کنڈآن جاری پارت آتیا عمل کننگ انگ ءِ، کمامدارآک پاریر کہ کسبی نسخان اٹی کمتی، مسافر آتیا پت سازی، آمد نو کٹیا تیٹی ودکی و جہانی آب آ پورو سلنگ کن پی آئی اے سی تینا بیڑہ ءِ اپ گریڈ کرینے و ڈرائی لیز آ دونیر و باڈی جہاز ہم بیڑہ ٹی اوار کرینے۔ مستین خڑک اٹ پی آئی اے کراآ جہاز دوئی کننگ نا جاگہ غا تینا جہاز آتا کمک اٹ حج جہاز آتا آپریشن ءِ پورو کرے۔ کمامدارآک پاریر کہ سیالکوٹ۔ پیرس، سیالکوٹ۔ بارسلونا، پشاور۔ شارجہ، پشاور ۔العین و ملتان۔شارجہ کون آ کٹیا کروک پوسکن آ فضائی روٹ آتا بناءِ کننگانے و نسخان والا روٹ آتیا آپریشن ءِ معطل کرسا کٹیا کروک روٹ آتیکن جہاز آتا کچ اٹی ودکی کننگا۔ ہنداٹی سپریم کورٹ نا پرمان تے مون آ تخسا گھوسٹ ملازم و جعلی ڈگری تخوک آ عملہ نا باسک آتے اینک کننگا و ملازم آتا طبی آسراتی ءِ سینٹر لائز کرسا دا مد اٹ خڑچ آتیٹی کمتی اتنگا۔
