اسلام آباد۔ 02 نومبر (اے پی پی) بنجائی وزیر مذہبی امور ڈاکٹر نورالحق قادری پارینے کہ مچ آ عالم اسلام یک توار مرسا فرانس نا حکومت و صدر نا کنڈآن توہین آمیز خاکہ غاتا جسارت نا دفاع نا ورندی ءِ ایتر، آجوئی سلاہ درشانی نا گڑاس دنگ مریک، اتحاد بین المسلمین و بین المذاہب ہم آہنگی وخت انا اہم ءُ خواست اسے۔ او دوشنبے نادے آ داڑے جامع مسجد نیشنل پریس کلب نا بنائی دود آن تران کریکہ۔ بنجائی وزیر مسجد نا تفنگ کن آباد باؤنڈیشن و نیشنل پریس کلب نا منتظمین آتا منت واری ءِ ہرفسا پارے کہ مسیت نا اسلامی راج اٹی اہم کڑد اسے۔ مستین اٹ مسیت آتیٹی سائنسی علم انا تعلیم تننگاکہ و مسیت آن فلاح نا کلہو تننگاکہ ولے ساڑی آ دور اٹی نن مسیت آتے چندی وڑنا تفرقہ غاتا ذریعہ جوڑ کرینن۔ اوپارے کہ واقعی ننا ملک اٹی بین المسالک و بین المذاہب ہم آہنگی نا کنڈآ چکار کننگے۔ مسلمان تا تہہ نا پرخ ننے برباد کرینے، دا اختلاف آتیان نن پیش تمان تو دنیا نا اسہ طاقت اس ہم ننے چٹفنگ کپک۔ ہندو، سکھ و عیسائی تتون ننا انسانیت نا رشتہ ءِ۔ اوپارے کہ ہرا سعودی زالبول ننے مسیت نا دا ٹیکی ءِ تسنے نن اونا منت وار اُن۔ بنجائی وزیر پارے کہ سعودی عرب تون ننا رشتہ ہم مسجد الحرام و مسجد نبوی نا ءِ، دا رشتہ پنپروک اوسے۔ اوپارے کہ فرانس نا حکومت و صدر گستاخانہ خاکہ غاتا دفاع و اسلام آ تنقید کننگ ءُ، آجوئی سلاہ درشانی نا گڑاس دنگ مریک، یک و نیم ارب مسلمان تا است آتے ہسون کننگ نا موکل تننگ مفک۔ اوپارے کہ کانودی چاہندار و صحافیک ہم دا حالیت آتا توننگ کن مون آ بریر۔ اوپارے کہ شیخ الازہر پارے کہ مسلم لائرز فورم نا کمک اٹ کانودی چارہ جوئی کینہ، وزیراعظم عمران خان چندی سروک مملکت آتے ہرا چھٹی تے مون تسنے، او جہانی لیڈر آتون فون آ ہیت کیرہ۔ مچ آ عالم اسلام دا چرجوئی ٹی اواری اٹ تینا موقف نا درشانی ءِ کیر۔ اوپارے کہ داباندات آ عالم اسلام اٹ غٹ آن مست رجب طیب اردگان و وزیراعظم عمران خان نا توار بسنے، ننا کوشست مریک کہ ہمیشہ ہمیشہ کن داوڑنا حرکت آتے توننگ مرے۔
