کوئٹہ۔ 14 اکتوبر (اے پی پی) بنجائی وزیر سیفران و چیئرمین کشمیر کمیٹی شہریار آفریدی پارینے کہ انتہاپسندی و دہشت گردی نا چٹفنگ کن ’قرآن و سنت ءِ مون آ تخسا جوڑ مروک آ آئین پاکستان ہی بنداوی بیانیہ ءِ داڑآن انتہاپسندی و دہشت گردی نا مون ءِ توننگ اٹ کمک رسینگک۔ داخیال آتا درشانی ءِ او ہم پاکستانی و پیغام پاکستان بی آر ایس پی نا کنڈآن دود آن تران کرسا کرے۔ دود اٹی صوبائی اپوزیشن لیڈر ملک سکندرایڈووکیٹ، چیئرمین پبلک سروس اکاؤنٹس کمیٹی اختر حسین لانگو، ڈپٹی اسپیکر بلوچستان کہدہ بابر، چیف ایگزیکٹو بی آر ایس پی نادرگل بڑیچ و ایلو تعلقدار کمامدارآک بشخ ہلکر بنجائی وزیر پارے کہ نظام نا خامی تے مُر کننگ کن قومی یکجہتی نا گرج آ زور شاغا دہشت گردی نا برخلاف عالم آتا امنائی بیانیہ داہیت انا شاہدی ءِ کہ قوم ملک آن دہشت گردی و انتہاپسندی نا چٹفنگ کن سنبرینگوک ءِ۔ بنجائی وزیر روشنا آخبت کن تینا صف آتیٹی سیوت و یکجہتی ءِ مون آ دننگ نا گرج آ زور شاغا۔ اوپارے کہ چندی مکاتب فکر انا عالم دین و وفاق المدارس تین پہ تینی سلابت و امنائی سلاہ اٹ ہرا فتویٰ جاری کرینو او سہی کنڈاٹ اسہ مثبت پیش رفت اسے، ہراڑآن دا پیدوار مریک کہ پاکستان اسہ اسلامی ریاست اسے و اسلام امن مہرومریبت و رواداری نا دین ءِ دا مرحلہ ءِ طے کننگ آن پد المی ءِ کہ قوم انا ایلو تپہ غاتا نقطہ نظرءِ ہم اوار کننگ نا کوشست کننگے تانکہ ہر تپہ دانا مون آ دننگ اٹ کڑد اداکے بنجائی وزیر نا مستی پاننگ ئس کہ پاکستان قدرت نا ہمو عظیم ٹیکی ءِ ہراڑآ اللہ پاک نا اخس کہ شکر ءِ کننگے کم ءِ۔ ولے حقیقت دادے کہ ننے ہراوڑدانا شکر ءِ ادا کروئی ئس کننگ متو۔ دانا اسہ بھلا سوب دادے کہ اسہ وخت اسے آن ننا حکمرانک جانے انجانے ٹی دوقومی نظریہ نا اہمیت ءِ گوجالنگ نا بناءِ کرینو۔ ایہن تو ہندوستان اٹ مسلمان تتون ہرا رویہ ءِ اینو نریندر مودی حکومت رواتخانے اودے ہرسا دوقومی نظریہ نا فلسفہ برصغیر پاک و ہند اٹ رہینگوک آ غٹ مسلمانک جوان بایدے پہہ مریر۔ اوپارے کہ پاکستانی زرگزران ءِ سوگوی نصیب مس و پاکستان شونداری نا کنڈآ ہنا و ولدا ننا چناتا آخبت ہم روشنا مرے داڑکن ملک اٹ غٹ ادارہ و محکمہ غاک تینا فرض ءِ داوڑاٹ ادا کیر کہ مخلوق تینا باندات آتیٹی الجھن آتیان بچنگ کیر۔ و لس پاکستانی چک و تاڑ نا چاگڑد آن پیش تمسا زند ءِ خوشگوار وڑاٹ تیر کننگ نا کوشست کیر۔ کنا خیال ءِ کہ بھلا مسخت نا دوئی کننگ کن ننے چنکا چنکا گڑاتے جوان کروئی مریک۔
