کوئٹہ۔ 13 اکتوبر (اے پی پی) صوبائی وزیر داخلہ میر ضیاء اللہ لانگو پارینے کہ ساڑی صوبائی حکومت وزیراعلیٰ بلوچستان جام کمال خان عالیانی نا کماشی ٹی الس ءِ آسراتی فراوان کننگ کن ہردم کوشست کننگ ءِ۔ تعلیم جان جوڑی و انفراسٹرکچر ڈویلپمنٹ آ خصوصی چکار کننگ انگ ءِ، طالب علم آتا ویل آتے ایسر کننگ کن ہروڑنا کوشست کننگ انگ ءِ، صوبہ ٹی امن و ایمنی نا حالیت آک مست آن بھاز جوان مسنو ہراڑکن غٹ تعلقدار ادارہ غاک تینا گچین کڑد ءِ ادا کرینو۔ صوبائی وزیر داخلہ میر ضیاء لانگو پارے کہ صوبہ نا الس ءِ گچین بنداوی آسراتی تا فراوانی ان الس نا پت بحال مسنے، کچ اٹنگا وسیلہ غاتیان پد ہم صوبہ نا غٹ ضلع غاتیٹی اسہ وڑ شونداری ءِ پک کننگ انگ ءِ تانکہ الس اٹ احساس محرومی مف۔ وزیراعلیٰ بلوچستان جام کمال خان شونداری ڈٹ آتا وخت آ پوروی ءِ ہم پک کننگ ءِ تانکہ زوت شونداری نا بھرمک الس اسکان سرمننگ کیر۔ کم شون ہلوک علاقہ غاتے ایلو ضلع غاتا بریبر اتنگ کن شونداری پیکج اس بناکننگانے تانکہ اسہ وڑ شونداری ءِ ممکن کننگے۔ وزیر داخلہ میر ضیاء لانگو نا مستی پاننگ ئس کہ سوشل میڈیا و انٹرنیٹ نا آسراتی الس اٹ آگاہی فراوان کرینے۔ الس داسہ مہالو آن بھاز زیات باشعور ءُ۔ معلومداری اسکان رسینگ آن الس تینا شونداری ڈٹ آتیان جوانی اٹ بلد ءِ۔ ساڑی آدور اٹی الس ءِ دھوکہ تننگ مشکل آخا بلکن ناممکن مسنے۔ عملی گام گیج کننگ آن بیدس الس نا پت ءِ ہلنگ داسہ ناممکن مسنے۔
