اسلام آباد۔ 13 اکتوبر (اے پی پی) اسپیکر قومی اسمبلی اسد قیصر پارینے کہ خصوصی بندغ آک بے پناہ لائخی تا خواجہ مریرہ و راج انا شونداری و شونہالی ٹی اہم ءُ کڑد اس ادا کننگ کیرہ، اوفتے تون مہر و مریبت اٹ پیش بننگ ننے آ غٹ آ المی ءِ، ننا زرس چکار اوفتا زند ءِ خوشی تیان پُر کننگ کیک، پارلیمان ءِ خصوصی بندغ آتا ویل آتا سماءِ ہنداخاطرآن تاریخ اٹ اولیکو وار خصوصی بندغ آتیکن پارلیمانی کمیٹی اس جوڑ کرینن، حکومت خصوصی بندغ آتا راجی آسراتی، تعلیم و تربیت ءِ پک کننگ کن گام گیج کننگ ءِ۔ داخیال آتا درشانی ءِ او سے شنبے نادے آ خصوصی بندغ آتیکن کاریم کروک آ تنظیم تا نمائندہ غاتا ڈل اتون گپ وتران کرسا کرے۔ اسپیکر قومی اسمبلی ڈل اتون گپ وتران کرسا پارے کہ پارلیمنٹ اٹ خصوصی بندغ آتے مون تروک ویل آتے ایسر کننگ کن پارلیمان نا تاریخ اٹ اولیکو وار پارلیمانی کمیٹی اس جوڑ کرینن ہرانا اولیکو باقاعدہ دیوان ءِ بروک آ ہفتہ غا بٹنگک۔ اوپارے کہ کمیٹی خصوصی بندغ آتے مون تروک ویل آتیا سجفک و ویل آتا ایسری کن سلاہ و سوج شین کیک۔ اسپیکر ڈل انا نمائندہ غاتے پارے کہ خصوصی بندغ آتیکن کروک آ کانود سازی ٹی اوفتا کمک اہمیت تخک۔ اوپارے کہ تدوک آ دیوان اٹی خصوصی بندغ آتیکن بل پاس کرفنگانے ایلو صوبہ غاتے ٹی صوبائی کہول آ داوڑنا کانود سازی کیر تانکہ نن خصوصی بندغ آتے راج اٹ اوفتا روا ہند و بنداوی آسراتی فراوانی ءِ پک کننگ مرے۔ اوپارے کہ خصوصی بندغ آتیکن پین کانود سازی آ سجفنگ انگ ءِ، سرکاری ملازمت آتیٹی جتا کوٹہ غا سختی اٹ عملدرآمد کننگ نا گرج ءِ۔اسد قیصر پارے کہ اسہ جسمانی معذوری نا سوب آن اوفتے گوجالنگپ۔ ڈل خصوصی بندغ آتیکن خصوصی است خواہی ہلنگ آ اسپیکر قومی اسمبلی اسد قیصر نا منت واری ءِ ہرفے۔
