اسلام آباد۔ 13 اکتوبر (اے پی پی) صدر مملکت ڈاکٹر عارف علوی پارینے کہ پاکستان غٹ سنگت ملک آتون تین پہ تینی است خواہی نا بشخ آتیٹی تعلقداری تے پین مون آ دننگ و ڈیہہ ٹی امن و سوگوی کن کوشست کننگ ءِ۔ ایوان صدر نا کنڈآن سے شنبے نادے آ جاری بیان نا رداٹ صدر مملکت برازیل، ڈنمارک، سویڈن، یونان، ہنگری و یوکرائن نا پندار سفیر آتون گپ وتران کریکہ ہرافک اودے اسہ دود اسے ٹی تینا سند آتے پیش کریر۔ صدر مملکت ڈاکٹر عارف علوی پوسکن آ سفیر آتے مبارکباد پیش کرے و اومیت ظاہر کرے کہ پندار سفیر تین پہ تینی زرگزرانی، سیاسی، دودوربیدہ ئی و سفارتی تعلقداری تون اوار غٹ بشخ آتیٹی تعلقداری تے پین سوگو کیرہ۔ صدر مملکت پارے کہ پاکستان تین پہ تینی است خواہی نا بشخ آتیٹی غٹ سنگت ملک آتون تعلقداری تے پین مون آ دننگ نا خواہندار ءِ۔ اوسفیر آتے حکومت نا اسمارٹ لاک ڈاؤن پالیسی نا بارواٹی معلومدار کرے ہراڑآن کوویڈ۔ 19 نا توننگ اٹ کمک رسینگا۔ اوپارے کہ پاکستان ڈیہہ ٹی امن و سوگوی نا مون آ دننگ کن کوشست کننگ ءِ۔ صدر مملکت بھارت نا کنڈآن مقبوضہ جموں و کشمیر نا مسلمان تا انسانی حق انا لتاڑآتے ہم تالان کرے۔ اوپارے کہ بھارت اقلیت آتیا ظلم کرسا دہشت گردی نا راج ءِ مسلط کرینے۔ صدر مملکت جہانی برادری آن خواست کرے کہ او بھارتی سیکورٹی فورس آتا مسلمان و ایلو اقلیتی گروہ تیا بیدادی نا نوٹس ءِ ہلے۔ پندار سفیر آک صدر مملکت تون جتا جتا اوڑدہی ہم کریر۔
