جہانی برادری کشمیر نا ویل انا آخبتی ایسری کن تینا کڑد ءِ ادا کے، وزیر خارجہ شاہ محمود قریشی نا برطانوی ہائی کمشنر تون اوڑدہی ٹی گپ وتران

اسلام آباد۔ 13 اکتوبر (اے پی پی) وزیر خارجہ مخدوم شاہ محمود قریشی جہانی برادری آ زور شاغانے کہ او مظلوم کشمیری تے بھارتی استبداد آن نجات ترفنگ و کشمیر نا ویل انا آخبتی ایسری کن تینا کڑد ءِ اداکے۔ داہیت ءِ او پاکستان اٹ تعینات برطانوی ہائی کمشنر ڈاکٹر کرسچین ٹرنر تون گپ وتران کرسا پارے ہراسے شنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری، کورونا دین اتون اوار تین پہ تینی است خواہی نا باندات آتیا گپ وتران کننگا۔ وزیر خارجہ پارے کہ پاکستان و برطانیہ نا نیام اٹ دیرینہ و ہڑتوم آ کنڈآتا تعلقداری ساڑی ءِ۔ برطانیہ، پاکستان نا اہم واپاری شریدار ءِ و نن دا شریداری ءِ مون آ دننگ خوانہ۔ برطانوی ہائی کمشنر پارے کہ پاکستان ہرا حکمت عملی اٹ کورونا دین انا تالانی ءِ توننگ اٹ سرسہبی دوئی کرینے او ستاکڑزک۔ وزیر خارجہ بھارت نا غیر کانودی کوزہ گیری ٹی جموں و کشمیر اٹی برجا انسانی حق انا بھلا خلاف ورزی تا ذکر ءِ کرسا جہانی برادری آ زور شاغا کہ او مظلوم کشمیری تے بھارتی استبداد آن نجات ترفنگ و اقوام متحدہ نا قرارداد آتے مون آ تخسا کشمیر نا ویل انا آخبتی ایسری کن تینا کڑد ءِ ادا کے۔ برطانوی ہائی کمشنر اوغانستان اٹی امن کن پاکستان نا خیرخواہی نا کوشست آتا ستاءِ کرے۔ اوڑدہی ٹی چاگڑدی بدلی، تعلیم و سیل وسوات نا بشخ آتیٹی ہڑتوم آ کنڈآتا کمکاری ءِ مون آ دننگ نا بابت ہم خصوصی گپ وتران مس۔ برطانوی ہائی کمشنر کرسچین ٹرنر پاکستان نا سیل و سواتی ہند آتا سفت ءِ کرسا، تینا ساڑی آ دورہ قطبی علاقہ غاتیان وزیر خارجہ ءِ معلومدار کرے۔