چِل لکھ کزیت کروک بندغ آتا پن ءِ گچین کاری مہشون تیان کشنگانے، الیکشن کمیشن نا وضاحت

اسلام آباد۔ 13 اکتوبر (اے پی پی) الیکشن کمیشن دا خبر نا تردید ءِ کرینے ہراٹی پاننگانے کہ بلدیاتی ادارہ کزیت کروک بندغ آتا ڈیٹا ءِ تفننگ ءِ ہرانا سوب آن گچین کاری مہشون تیٹی کزیت کروک بندغ آتا وونٹ ہم درج ءِ۔ دا بابت الیکشن کمیشن پیدوار کرینے کہ 2012ء آن داتم اسکان مرحلہ بہ مرحلہ مروک آ گچین کاری مہشون تا نظرثانی ٹی بلدیاتی ادارہ و نادرا نا کنڈآن تروک آ سرجم آتا رداٹ کم و ود 40 لکھ آن زیات کزیت کروک بندغ آتا پن ءِ گچین کاری مہشون تیان کشنگانے۔ گچین کاری مہشون تا نظرثانی 2017-18ء ٹی الیکشن کمیشن آف پاکستان اٹی 8 لکھ آن زیات و گچین کاری مہشون تا نظرثانی سال 2019-20اٹی الیکشن کمیشن آف پاکستان 7 لکھ 50 ہزار آن زیات کزیت کروک بندغ آتا پن ءِ گچین کاری مہشون تیان کشانے۔ الیکشن کمیشن آف پاکستان دا ہیت انا اہمیت ءِ مون آ تخسا لوکل گورنمنٹ نا تعلقدار کمامدار آتے پارینے کہ کزیت کروک بندغ آتا کوائف الیکشنز ایکٹ 2017نا سیکشن 43 نا رداٹ سہ ماہی بنداو تیا الیکشن کمیشن آف پاکستان نا ضعلی الیکشن کمشنر زیارجسٹریشن آفیسر آتے ایتر تانکہ کانود نا رداٹ غٹ کزیت کروک بندغ آتا وونٹ گچین کاری مہشون تیان کشنگے۔