اقوام متحدہ۔ 13 اکتوبر (اے پی پی) پاکستان پدتموک ملک آتے انفراسٹرکچر اٹ زرکاری نا آسراتی کن فنڈ آتا فراوانی نا خواست کرینے تانکہ او کورونا دین آن مروک آ نسخان تا مون ءِ تورسا شونداری نا عمل اٹ ترندی اتنگ کیر۔ اقوام متحدہ ٹی پاکستان نا سفیر منیر اکرم جنرل اسمبلی نا مالی و اقتصادی باندات آتا جاچ ءِ ہلوک آ کمیٹی ءِ پارے کہ دین انا سوب صدی نا بدترین کساد بازاری مس دادین اسہ صدی نا بدترین کساد بازاری ودی کرے ہرانا سوب آن دہ کروڑ آن زیات بندغ بھاز نیزگاری نا پلویڑ اٹ بریرہ، اسہ دہائی نا شونداری فائدہ غاک زیان مریرہ، و ایجنڈا 2020ء نا دوئی کننگ پین مشکل مریک وخت اس کہ انفراسٹرکچر ڈویلپمنٹ نا بابت شرہ ٹی بشخ ہلسا، پاکستانی سفیر پارے کہ دا منفی سوب آتیٹی نیزگاری، سیاسی بے چیٹی و چاگڑدی تباہی تالان مریک۔ اوپارے کہ دا کیہی جہتی دا تنکی نا مون ءِ توننگ نا گام گیج آک بھلو کچ اسے آ و مربوط مریر ہراڑآن دین آ کنٹرول ناہدف آک ہم آہنگ مریر، پائیدار شونداری ہدف(ایس ڈی جی) نا ادراک مرے و ماحولیاتی بدلی نا رفتار ءِ کم کننگ کن پیرس معاہدہ آ عملدرآمد ہم مرے۔ پاکستانی سفیر پارے کہ ننے بنداوی پنجر نا زرکاری کن درکار بھلا و مریس مدتی فنانس ءِ فعال وڑاٹ متحرک کروئی مریک۔ پدتموک ملک آتیٹی بنداوی پنجر نا زرکاری ءِ اولیت تننگ کن اسہ پبی ءُ زرگزرانی استدلال اس ساڑی ءِ، اومستی پارے کہ شون ہلوک زرگزران تیٹی زرکاری آ کٹیا دوگنا و سہ گنا مننگ کیک۔ دا چرجوئی ٹی، اوایلو زموار آتون، علاقائی و سیم آن ایپار بنداوی پنجر نا گام گیج آتیکن کمک، رابطہ غاتے ودفنگ، پائیدار و بنداوی پنجر اٹ بجلی نا گریڈ و زرکاری ، آئی ٹی و ڈیجیٹل ایپلی کیشن تیٹی پیش رفت نا کاریم اٹ اتنگ و دافتے قابل عمل تیار کننگ اٹ کمک کننگ نا سلاہ پیش کرے۔ پاکستانی سفیر پارے کہ اقوام متحدہ نا نظام نا تہہ ٹی بھلو کچ اسے آ مہارت، ہرافتے ٹی زیات تر پدتموک ملک آتیٹی اونا ملکی دفتر آک اوار ءُ، ءِ پدتموک ملک آتا اولیتی قابل عمل پائیدار شونداری ڈٹ آتا پیدواری کننگ و تیار کننگ کن کاریم اٹ اتنگ مریک۔ اوپارے کہ جہانی سیاسی مخ تفی اتون، اقوام متحدہ پدتموک ملک ، آفیشل ڈویلپمنٹ اسسٹنس فراوان کروک آ و نجی و سرکاری بشخ انا زرکار آتا کمک اٹ زرکاری نا فیصلہ و گام گیج آتے متحرک، زیات آن زیات ومربوط کننگ کیک، تانکہ پائیدار شونداری نا ہدف آتا دوئی کننگ ءِ مون آ دننگ مرے۔ اومستی پارے کہ نیزگار ملک آتیٹی انفراسٹرکچر نا جوان زرکاری جہانی زرگزران ءِ بحال کننگ کیک و غریبی چٹنگ مریک، پیرس نا آب وہوا نا معاہدہ نا کنڈآ پیش رفت نا باوری و جہانی شونداری نا ہدف آتیا عملدرآمد اٹ نمان پیش رفت کننگ کیک۔
