اٹاوا۔ 13 اکتوبر (اے پی پی) کینیڈا ٹی پاکستان نا ہائی کمشنر رضا بشیر تارڑ پاکستانی تنظیم تے تینا جملہ وسیلہ غاتے یکجا کننگ کن کنسوریشم اس جوڑ کننگ و پاکستان اٹ کشت وکشار، تعمیرات، تعلیم و خور انا بشخ آتیٹی مریس میعاد بھلا ڈٹ آتا بناءِ کننگ نا سلاہ تسنے۔ اوداہیت ءِ اٹاوا ٹی پاکستان ہائی کمیشن نا دورہ غا بروک آ قطبی امریکہ و کینیڈا نا چندی شار تیان تعلق تخوک آ زرکار و کاروباری خواجہ غاتون گپ وتران کرسا پارے۔ رضا بشیر تارڑ اوفتے اسیجاوڑاٹ پبی کاروباری سلاہ تیار کننگ و کینیڈا نا پاکستانی تنظیم تا کاروباری باسک و زرکارآتیا تالان اسہ ڈل اسے پاکستان نا دورہ ءِ کننگ نا سلہ خلک ہراڑکن اٹاوا ٹی جوڑ پاکستان مشن و کینیڈا نا ایلو شار تیٹی جوڑ پاکستانی قونصلیٹ سلاہ ئی ڈل انا باسک آتا زرکاری بورڈ و ایلو تعلقدار پاکستانی ادارہ غاتون اوڑدہی و اوکان پد پاکستان اٹ کاروباری ڈٹ و شریداری بناکننگ کن پبی کمک و پورو کمکاری فراوان کیک۔ ایڈمنٹن، البرٹاآن تعلق تخوک آ پنی آ کاروباری و راجی شخصیت مبین احمد آن بیدس عطاء الرحمان سید و کینیڈا پاکستان ایسوسی ایشن نیشنل کیپٹل ریجن نا صدر صدف ابراہیم ہم اوڑدہی ٹی ساڑی ئسر۔ داکان بیدس ہائی کمشنر رضا بشیر تارڑ نا پارت آ ڈپٹی ہائی کمشنر پاکستان شہباز ملک پاکستان اٹ کینیڈا نا ٹریڈ کمشنر مارگھس میکڈونلڈ ہرادے تیٹی کینیڈا نا دورہ غاٹی ءِ، تون اوڑدہی کرے و ہڑتوم آ ملک آتا نیام اٹ تین پہ تینی واپار و ایلو باندات آتیا گپ وتران کریر۔ اوڑدہی ٹی پاننگاکہ کینیڈا نا غٹ آن بھلا سافٹ ویئر کمپنی’کانسٹلیشن سافٹ ویئر‘ ساڑی ہی ٹی کراچی، لاہور و اسلام آباد آن اسہ ہزار نا لگ بھگ ورناپاکستانی سافٹ ویئر انجینئرز و پروگرامرز بھرتی کرینے ہرافتیٹی زالبول ہم اوار ارے۔ ہنداوڑ قابل تجدید توانائی ٹی شہرت تخوک کینیڈین کمپنی جے سی ایم صوبہ سندھ اٹی جھم پیر انا علاقہ ٹی 50 میگاواٹ بجلی نا پلانٹ خلکونے وخت اس کہ 50 میگاواٹ بجلی نا و پلانٹ نا تفنگ نا کاریم آخریکو ریسہ غاتیٹی ءِ۔ داکان بیدس کینیڈین کمامدار و پاکستان نا پرائیویٹ پاور اینڈ انفراسٹرکچر بورڈ انا نیام اٹ ملک اٹ پاور ٹرانسمیشن نا تفنگ و تنصیب نا اسہ بھاز بھلو ڈٹ اسے آ گپ وتران برجاءِ ہراڑکن مالی وسیلہ غاتا فراوانی کن کینیڈین کمرشل کارپوریشن (سی سی سی) و ایلو کیہی زرکارآک تیاری کرینو۔
