اسلام آباد۔ 13 اکتوبر (اے پی پی) مچ آ ملک آن رجسٹرڈ اوغان باہوٹ آتا وطن آ پدی ہِننگ نا عمل برجاءِ یکم ستمبر آن داتم اسکان 600 اوغان باہوٹ تینا وطن آ پدی ہنانو یو این ایچ سی آر نا کنڈآن 200 امریکی ڈالر ہر اسہ بندغ ءِ تننگ انگ ءِ۔ سے شنبے نادے آ یو این ایچ سی آر نا ترجمان قیصر خان اے پی پی تون گپ وتران کرسا پارے کہ پاکستان اٹ رہینگوک آ رجسٹرڈ اوغان باہوٹ آتا وطن آ پدی ہِننگ نا عمل کوویڈ۔ 19 آن عارضی وڑاٹ یکم مارچ آن بند کننگاسس ولے کوویڈ۔ 19 نا لاک ڈاؤن نا چٹنگ آن پد یکم ستمبر آن رجسٹرڈ اوغان باہوٹ آتا پدی ہِننگ نا عمل دُوارہ بناکننگانے۔ داتم اسکان مچ آ ملک آن رجسٹرڈ اوغان باہوٹ آتا 150 خاہوت آتون اوار 600 بندغ وطن آ تینا پدی سرمسنو۔ اوپارے کہ پاکستان آن وطن آ پدی ہنوک آ رجسٹرڈ اوغان باہوٹ آتے 200 ڈالر ہر اسہ بندغ ءِ یو این ایچ سی آر نا کنڈآن مالی کمک تننگ انگ ءِ۔ قیصر خان وطن آ پدی ہنوک آ رجسٹرڈ اوغان باہوٹ آتے پارت کرینے کہ او وطن آ پدی ہِننگ کن یو این ایچ سی آر نا پن کروک ہند آتیا ہنسا وطن آ پدی ہِننگ کن رجسٹریشن کرفر وخت اس کہ وطن آ پدی ہِننگ نا بابت پن کروک تاریخ آن اسہ دے اس مست یو این ایچ سی آر نا ہند آتیا فون کرسا تینا پدی ہِننگ ءِ پک کیر۔
