اسلام آباد۔ 13 اکتوبر (اے پی پی) نیشنل کمانڈ اینڈ آپریشن سینٹر(این سی او سی) نا دیوان سے شنبے نادے آ بنجائی وزیر شونداری و ڈٹ بندی اسد عمر نا کماشی ٹی مس، دیوان اٹی صوبہ غاتا چیف سیکرٹریک ویڈیو لنک انا کمک اٹ بشخ ہلکر۔ فورم ءِ معلومدار کننگاکہ مچ آ ملک اٹی 103 ضلع غاتیٹی 497 سمارٹ لاک ڈاؤن نافذ کننگانے۔ فورم ءِ پاننگاکہ 52 درسد کورونا ٹیسٹ ٹریس، و قرنطینہ (ٹی ٹی کیو) حکمت عملی نا رداٹ کننگانے۔ بنجائی وزیرشونداری و ڈٹ بندی اسد عمر پارے کہ دا دین انا برخلاف کروک آ گام گیج آتیٹی بھاز انگا نہادی جان تے بچفنگانے۔ داتم اسکان نن بحیثیت قوم و غٹ اسٹیک ہولڈر آک سہی گام گیج کرینن۔ بنجائی وزیر شونداری و ڈٹ بندی اسد عمر پارے کہ کورونا نا دین انا تالانی نا برخلاف سرسہبی ٹی داتم اسکان مخلوق نا فعال ردعمل اہم ءُ حیثیت اس تخک۔ پاکستانی الس نئے بیرہ تینا رکھ اکن بلکن ایلوفتا رکھ و خیریت ءِ پک کننگ کن راہشون اصول آتیا عمل کننگ کن بھاز پختگی و زمواری نا درشانی ءِ کرینو۔ اسد عمر میڈیا ءِ دا دین انا بابت الس اسکان گچین کلہو رسیفنگ آ اوفتے خراج تحسین پیش کرے۔ پاکستانی الس و میڈیا اِرااہم تمبہ ءُ ہرادا دین انا تالانی نا برخلاف کوشست آتے سرسہب کریر۔ اسد عمر مستی پارے کہ ملک اٹ گمانی وڑاٹ کورونا نا ارٹ میکو لہر ءِ چیک کننگ کن دا دین انا تالانی نا رسک ءِ کم کننگ المی ءِ۔ اوزور شاغاکہ درو این سی سی نا دیوان ءِ مون آ تخسا ماسک بیننگ و جان جوڑی نا راہشون اصول آتیا عمل کننگ تون اوار رکھی گام گیج آتے پک کننگ نا گرج ءِ۔ چیف سیکرٹری سندھ فورم ءِ معلومدار کرے کہ نن تعلیمی ادارہ و میرج ہال آتا چاروکی ءِ کننگ اُن و این سی او سی نا کمک اٹ جاری کروک جان جوڑی نا پارت آتا رداٹ انتظامی گام گیج آتے پک کننگک۔ چیف سیکرٹری کے پی فورم ءِ پارے کہ نن کوویڈ۔ 19 پروٹوکول نا خلاف ورزی آ گڑاس ریسٹورنٹ و شادی ہال تا برخلاف انتظامی گام گیج کرینن۔ چیف سیکرٹری بلوچستان فورم ءِ معلومدار کرے کہ این سی او سی ٹی ٹی کیو نا حکمت عملی آ عمل کننگ نا سوب آن بلوچستان اٹ کوویڈ کیس آتیٹی کمتی نا بابت گچینی بننگ ءِ۔
