اسلام آباد۔ 12 اکتوبر (اے پی پی) وزیراعظم عمران خان پارینے کہ ساڑی آ دور انا چیلنج آتون مون تننگ و فرقہ واریت نا توننگ کن عالم دینک تینا کڑد ءِ ادا کیر و الس ءِ کورونا غان بچفنگ نا بابت راہشونی ہم فراوان کیر۔ داخیال آتا درشانی ءِ او خیبر پختونخوا غان تعلق تخوک آ پنی آ مذہبی شخصیت آتا ڈل اتون گپ وتران کرسا کرے ہرافک دوشنبے نادے آ داڑے اوڑتون اوڑدہی کریر۔ ڈل اٹی وزیر مذہبی امور پیر نور الحق قادری، پیر شمس الامین، پیر حبیب اللہ شاہ، پیر انور جنید شاہ و پیرزادہ جنید امین اوار ئسر۔ وزیراعظم ڈل اتون گپ وتران کرسا پارے کہ ساڑی آ دور انا چیلنج آتون مون تننگ کن المی ءِ کہ راج انا راجی، دودوربیدہ ئی و مذہبی قدر ءِ تالان کننگے و دارداٹ عالم دین تا اہم ءُ کڑد اسے۔ وزیراعظم پارے کہ عالم دینک مدام مشکل وخت اٹ حکومت و قوم انا راہشونی نا فرض ءِ سرتسنو۔ اواومیت ظاہر کرے کہ راج اٹ اسلامی قدر ءِ تالان کننگ، ساڑی آ دور انا چیلنج آتون مون تننگ و فرقہ واریت نا توننگ نا رداٹ عالم دینک ہندا جوزہ اٹ تینا کڑد ءِ ادا کرسا کیرہ۔ وزیراعظم اومیت ظاہر کرے کہ کورونا نا برخلاف جنگ اٹ عالم دینک و مذہبی شخصیت آک حکومتی کوشست آتون تفنگ ءِ برجاتخرہ و الس ءِ کورونا آن بچفنگ نا بابت راہشونی فراوان کرسا کیرہ۔
