اسلام آباد۔ 12 اکتوبر (اے پی پی) کورونا دین اٹی روزگار نا رکھ اکن اسٹیٹ بینک انا اسکیم نا رداٹ داوخت اسکان 16 لکھ، 25 ہزار، 251 ملازم آتا روزگار ءِ رکھ فراوان کننگانے۔ اسٹیٹ بینک آف پاکستان کورونا دین آن ودی مروک آ زرگزرانی مشکل و بے روزگاری ءِ توننگ کن دا اسکیم ءِ درستی راستی کرفے۔ اسکیم نا رداٹ کاروباری ادارہ غاتے آخبتی، کنٹریکٹ و دیہاڑی دارآتون اوار ہر وڑنا ملازم آتے تنخواہ تا زرتس اکن اڑزآن وام ہلنگ نا آسراتی فراوان کننگا۔ اسکیم نا رداٹ اپریل 2020آن ستمبر 2020ء ٹی تینا ملازم آتے برطرف کپروک آ ادارہ ملازم آتا مسہ تُو انا تنخواہ تیکن 5 درسد شرح سود آ وام ہلنگ کیرہ۔ فعال خراج گزار آتا فہرست اٹ اوار ادارہ غاتے 4 درسد نا کچ آ وام ہلنگ نا آسراتی فراوان کننگانے۔ اسٹیٹ بینک انا کنڈآن جاری کروک آ حساب وکتاب نا رداٹ 9 اکتوبر 2020اسکان دا اسکیم نا رداٹ 3476 کاروباری ادارہ و کمپنیک 19 لکھ، 9 ہزار، 654 ملازم آتا روزگار نا رکھ اکن 2 کھرب، 69 ارب، 83 کروڑ، 50 لکھ روپئی آن زیات انا وام اکن درخواست دائر کرے۔ اسٹیٹ بینک دافتیان 2813ادارہ و کمپنی تا کنڈآن اِراکھرب، 24 ارب 98 کروڑ، 50 لکھ روپئی اسکان نا وام درخواست آتا منظوری ءِ تس و ہنداوڑ 16لکھ، 25 ہزار، 251 ملازم آتا روزگار ءِ رکھ فراوان کننگا۔
