اسپیکر قومی اسمبلی اسد قیصر تون مراکش نا سفیر محمد کارمون نا اوڑدہی

اسلام آباد۔ 09 اکتوبر (اے پی پی) اسپیکر قومی اسمبلی اسد قیصر تون جمعہ نادے آ پاکستان اٹ مراکش نا سفیر محمد کارمون اوڑدہی کرے ہراٹی ہڑتوم آ کنڈآتا مسلم امہ ءِ مون تروک چیلنج و تین پہ تینی است خواہی نا ایلو باندات آتیا گپ وتران کننگا۔ داوخت آ اسپیکر اسد قیصر پارے کہ پاکستان و مراکش نا نیام اٹ تعلقداری مذہب، اخوت و دودوربیدہ نا سوگو بنداو آتیا ٹی ءِ۔ پاکستان مراکش تون تینا برادرانہ تعلقداری تے بھاز اہمیت ایتک و ہڑتوم آ کنڈآتا تعلقداری تے پین سوگو کننگ نا است خواہ ءِ۔ ہڑتوم آ ملک آتا پارلیمان تیٹی رابطہ غاتے مون آ درسا ہڑتوم آ کنڈآتا تعلقداری تے پین سوگو کننگ مریک۔ قومی اسمبلی ٹی جوڑ پاک مراکش پارلیمانی سنگتی پڑک پارلیمانی رابطہ غاتیٹی ودکی کن جوان ءُ فورم اس پک مننگ کیک۔ پاکستان اٹ زرکاری نا بھلو وارخواہی اس ارے ہراڑآن مراکش نا زرکار آک فائدہ ہرفنگ کیرہ، اسپیکر اسد قیصر پارے کہ ہڑتوم آ ملک آتیٹی اقتصادی رابطہ غاتے مون آ درسا ہڑتوم آ ملک آتیٹی مروک آ واپاری کچ اٹ ودکی کننگ مریک۔ پاکستان افریقی ملک آتون تینا تعلقداری تے پین سوگو کننگ کن لک افریقہ پالیسی آ عمل کننگ ءِ۔ مراکش نا سفیر پارے کہ مراکش پاکستان تون تینا دوستانہ، برادرانہ تعلقداری تے قدر انا نظر اٹ ہرک۔ ہڑتوم آ ملک آتا نیام اٹ دیرینہ تعلقداری وخت اتون اوار اوار پین سوگو مننگ ءِ۔ محمد کارمون پارے کہ مراکش پاکستان تون ہڑتوم آ کنڈآتا واپار اٹ ودکی آن بیدس زرگزرانی و دودوربیدہ تعلقداری تے سوگو کننگ خواہک۔ مراکش پاکستان نا اقتصادی بشخ آتیٹی کمکاری ءِ پین سوگو کننگ نا خواہندار ءِ۔