چیئرمین سینیٹ تون پاکستان کاٹن جنرز ایسوسی ایشن نا ڈل انا اوڑدہی

اسلام آباد۔ 09 اکتوبر (اے پی پی) چیئرمین سینیٹ محمد صادق سنجرانی تون پاکستان کاٹن جینرز ایسوسی ایشن نا چیئرمین ڈاکٹر جاسومال ٹی لیمانی نا کماشی ٹی چارباسکی ڈل جمعہ نادے آ پارلیمنٹ ہاؤس اٹ اوڑدہی کریر و چیئرمین سینیٹ ءِ پاکستان اٹ کرپاس نا فصل انا دسنگ و پیدوار اٹ پدریسہ کمتی نا بابت سرجم وڑاٹ معلومدار کریر۔ ڈل چیئرمین سینیٹ محمد صادق سنجرانی ءِ معلومدار کرے کہ پاکستان اٹ کرپاس آن کم و ود 15 ملین گانٹھ جوڑ مسکہ۔ کرپاس نادسنگ وپیدوار اٹ پدریسہ کمتی نا سوب آن اوفتا کچ 7 ملین اسکان محدود مسنے و آب اٹ بج و پوسکن آ مشینری نا دستیاب مفننگ نا سوب آن بزغرآتیٹی گیگ بدل فصل آتا دسنگ نا رجحان ودانے۔ بزغرآک ایلو فصل آتا دسنگ نا بناءِ کرینو ہراتم اسکان آب اٹ بج انا پوسکن آورائٹی و پوسکن آ مشینری نا دستیابی میسر مفک گچینی ممکن اف۔ کرپاس نا دسنگ و پیدوار اٹ ودکی نا بابت تعلقدار ادارہ غاتا پبی چکار، پوسکن آ بج انا ورائٹی و پوسکن آ پٹ وپول نا سخت گرج ءِ۔ چیئرمین سینیٹ محمد صادق سنجرانی ملک اٹ کرپاس نا دسنگ و پیدوار اٹ کمتی آ گڑتی نا درشانی ءِ کرسا پارے کہ کرپاس پاکستان نا پہچان ئس پاکستان اٹ جوان آب انا کرپاس ودی مسکہ ہراڑآن بڑزکو آب انا پچ ودی مسکہ۔ اوکشت وکشار نا بشخ آن تعلقدار ادارہ بشمول وزارت کامرس، وزارت قومی رکھ خور و کشاری پٹ وپول نا ادارہ غاتا نیام اٹ سوگو ہم آہنگی نا گرج آ زور شاغسا پارے کہ کرپاس نا فصل انا دسنگ و پیداوار اٹ ودکی کن نجی بشخ ءِ اوار کننگے۔ چیئرمین سینیٹ ایوان بالا نا قائمہ کمیٹی کامرس نا چیئرمین سینیٹر مرزا محمد آفریدی ءِ ٹاسک تس کہ کرپاس نا پیدوار و برآمد آتیٹی کمتی نا جاچ ءِ ہلنگ کن تعلقدار وزارت و پٹ وپول نا ادارہ غاتون اواری اٹ سرجم سلابت اٹ رپورٹ اس تیار کننگے ہراڑآن کرپاس نا دسنگ و پیدوار اٹ ودکی کن سلاہ مرتب کننگ مرے۔ چیئرمین سینیٹ پارے کہ کرپاس نا بج انا پوسکن آ ورائٹی و پوسکن آ مشینری اسکان لس بزغر آتا رسینگ آن دسنگ و پیدوار اٹ گچینی اتنگ مریک۔ اوپارے کہ صوبہ پنجاب، بلوچستان و ایلو صوبہ غاتیٹی ہم کرپاس دسنگ انگ ءِ ولے پیدوار اٹ ودکی نا بابت مربوط حکمت عملی نا سخت گرج ءِ۔ اوڑدہی ٹی چیئرمین سینیٹ تون اوار ایوان بالا نا قائمہ کمیٹی کامرس نا چیئرمین سینیٹر مرزا محمد آفریدی و ڈاکٹر اشوک کمارئسک ہم ساڑی ئسر۔