وزیراعظم عمران خان تون فیس بک انا چیف آپریٹنگ آفیسر شیرائل سینڈ برگ نا ورچوئل میٹنگ

اسلام آباد۔ 09 اکتوبر (اے پی پی )وزیراعظم عمران خان تون فیس بک نا چیف آپریٹنگ آفیسر (سی او او) شیرائل سینڈ برگ ورچوئل میٹنگ کرینے۔ داوخت آ پاکستان اٹ فیس بک نا زرکاری و لٹریسی نا گام گیج آتے ڈیجیٹلائز کننگ تون اوار کوویڈ۔ 19 نا بابت شریداری اٹ کاریم آ گپ وتران کننگا۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم عمران خان پاکستان اٹ فیس بک نا زرکاری نا ستاءِ کرے و پارے کہ کمپنی زرکاری ٹی ودکی کے۔ اوڈیجیٹل پلیٹ فارم آتا حیثیت ءِ امنا کرسا پارے کہ فیس بک کون آ ایلو ڈیجیٹل پلیٹ فارم آک پاکستانی ورناو ادارہ غاتے جہانی وارخواہی تیان فائدہ ہرفنگ اٹ اہم کڑد ادا کننگ کیرہ و دا ادارہ غاک مخلوق ءِ نیزگاری آن کشنگ اٹ کمکار مننگ کیرہ۔ وزیراعظم عمران خان جہانی کہول آ خار و انتہاپسندی نا ودوک آ رجحان آ گڑتی نا درشانی ءِ کرسا پارے کہ خار آ مبنی گپ وتران و تران تا آن لائن نشریات آتا برخلاف جنگ اسہ اہم ءُ ویل اسے۔ داوخت آ فیس بک نا زرکاری و اینخو سال پاکستان اٹ حقدار طالب علم آتیکن وظیفہ غاتا بابت ہم گپ وتران کننگا۔ ورچوئل میٹنگ اٹ فیس بک نا عطیہ دتر نا بابت گام گیج آتیا ہم گپ وتران کننگا۔ پاکستان اٹ فیس بک نا عطیہ دتر نا آسراتی تا بناءِ کننگ آن پد آن داتم اسکان 50 لکھ آن زیات بندغ سائن اپ کرینو۔ داوخت آ پاکستان ءِ پولیو آن پاک کننگ نا حکومتی گام گیج آتیٹی فیس بک نا کمکاری آ ہم گپ وتران کننگا۔ 2019ء ٹی فیس بک’انفارمیشن ٹیکنالوجی نا وزارت اتون شریداری ئس ہرانا مسخت پاکستان اٹ ہندی سٹارٹ اپس ءِ پٹ وپولی لیبز و سٹارٹ اپس سرکل پروگرام تیٹی کمک فراوان کننگ نا ءِ۔ داشریداری داسہ ہم برجاءِ و دانا رداٹ ورچوئل ورکشاپ نا کمک اٹ پاکستان اٹ سٹارٹ اپس نا چاروکی ءِ کننگ انگ ءِ۔ وزیراعظم عمران خان و شیرائل سینڈ برگ فیس بک انا ’’شی مینز بزنس پروگرام‘‘ آ ہم گپ وتران کریر ہرانا رداٹ مچ آ پاکستان اٹ کم و ود 6700 زالبول ءِ تربیت فراوان کننگ انگ ءِ۔ ورچوئل اوڑدہی ٹی فیس بک نا نائب صدر گلوبل افیئرز اینڈ کمیونیکیشنز نک کلگ’پاکستان اٹ فیس بک نا پبلک پالیسی نا سروک صارم عزیز آن بیدس ڈیجیٹل میڈیا نا بارواٹ وزیراعظم نا فوکل پرسن ڈاکٹر ارسلان خالد ئسک ہم ساڑی ئسر۔ یات سلے کہ وزیراعظم عمران خان و شیرائل سینڈ برگ اینخو سال جنوری ٹی ڈیوس سوئٹزرلینڈاٹ اوڑدہی کریسر۔