گوستگیں زمانگ ءَ انفارمیشن ٹیکنالوجی ءِ شوبگ ءَ را ڈلگچار کنگ ءَ ابید مئے ورنا آں وتی ازم ءَ را پیش داشتگ، شوبگ ءِ دیمروئی ءِ واستہ ھمک رنگیں گامگیج کنگ بیت، مزن وزیر عمران خان ءِ سروکی ءَ ملک ءَ انفارمیشن ٹیکنالوجی ءِ دیمروئی ءِ ھوالگ ءَ دیوان

اسلام آباد۔9اکتوبر (اے پی پی): مزن وزیر عمران خان ءَ گوشت کہ انفارمیشن ٹیکنالوجی ءِ شوبگ ءَ بے کساس ازم است انت، گوستگیں زمانگ ءَ ٹیکنالوجی ءِ شوبگ ءَ را ڈلگچار کنگ ءَ ابید مئے ورنا آں وتی ازم ءَ را پیش داشتگ، انفارمیشن ٹیکنالوجی ءِ شوبگ ءِ دیمروئی ءِ واستہ ھمک رنگیں گامگیج کنگ بیت۔ اے ھیالانی درشانی آئی ءَ ملک ءَ انفارمیشن ٹیکنالوجی ءِ دیمروئی ءِ ھوالگ ءَ دیوان ءِ سروکی ءَ کنان ءَ کت۔ دیوان ءَ صوبائی وزیر برائے ہائر ایجوکیشن پنجاپ راجہ یاسر ہمایوں، چیئرمین این آئی ٹی بی (نیشنل انفارمیشن ٹیکنالوجی بورڈ) سید شباہت علی شاہ، عامر ہاشمی ، وائس چانسلر آئی ٹی یو ڈاکٹر سرفراز خوارشید، شباہت رفیق ءُ چیئرمین پی آئی ٹی بی اظفر منظور ءَ بھر زوری کت۔ دیوان ءَ آئی ٹی سیکٹر ءِ دیمروئی ھاسیں رنگ ءَ گلوبل چِپ ڈیزائن انڈسٹری ءِ شوبگ ءَ ملکی ورنا آنی کار رپک آنی تہ ءَ گیشی آرگ ءِ ھوالگ ءَ شور ءُ مشور ءُ گامگیج آنی ھوالگ ءَ چار ءُ بچار کنگ بوت۔ مزن وزیر عمران خان ءَ دیوان ءَ گوں گشتانک دیان ءَ گوشت کہ انفارمیشن ٹیکنالوجی ءِ شوبگ ءَ ملک ءِ ورنائیں آباتی ءُ زانتکار ءُ بلدکاریں مردم آنی اندر ءَ بے کساسیں ازم است انت ، مئے ورنائیں آباتی ملک ءِ راستیں لکا ءُ مڈی انت، ملک ءِ جوڑیشت ءُ دیمروئی ءَ ورنا آنی گیشاں چہ گیش بھر زوری ءِ واستہ ضلوریگی انت کہ نوکیں شوبگ آنی تہ ءَ اے ورنا آناں آسراتی پجاری کنگ بہ بیت۔ مزن وزیر ءَ گوشت کہ گوستگیں وھد ءَ انفارمیشن ٹیکنالوجی ءِ شوبگ ءَ را سرجمیں رنگ ءَ ڈلگچار کنگ ءَ ابید مئے ورنا آں وتی ازم ءَ کتگ ءُ پیش داشتگ۔ آئی ءَ گوشت کہ استیں حکومت سرکاری تک ءَ اے شوبگ ءِ کمک ءِ واستہ جزمیگ انت ءُ اے رد ءَ ھمک رنگیں کوشست کنگ بیت۔ مزن وزیر ءَ چیئرمین این آئی ٹی بی ءَ را پنت ءُ شون کت کہ انفارمیشن ٹیکنالوجی ءِ دیمروئی ءِ ھوالگ ءَ پیش کتگیں شور ءُ مشور آناں پکوئیں رنگ دیگ ءِ ھوالگ ءَ سرجمیں گامگیج ءُ روڈ میپ جور کنگ بہ بیت۔