اسلام آباد۔8اکتوبر (اے پی پی): مزن وزیر عمران خان ءَ گوشت کہ کاروبار ءِ تہ ءَ آسانی پیداک کنگ، گیر ضلورگیں کار رھبند ءُ کار رپک آنی ھلاسی، ٹیکس ءِ نظام ءِ تہ ءَ گہتری ءُ کاروباری برات آناں ھمک رنگیں آسراتی پجاری حکومت ءِ اولی ترجی داتگیں کار انت۔ آئی ءَ اے ھیالانی درشانی آئی ءَ پنچ شمبے ءَ ادا ملک ءِ نامداریں صنعتکار ءُ کراچی ءِ کاروباری ڈل آں گوں ترقان کنان ءَ کت۔ ڈل ءِ تہ ءَ میاں انجم نثار، شارق وہرا، سلیم الزماں، فیصل معیض، محمد علی، عبدالہادی، نوید شکور، انجینئر نثار ، اجمل افضل ءُ زبیر باویجہ ھوار اتنت۔ اے موہ ءِ سر ءَ گورنر سندھ عمران اسماعیل، بنجاھی وزیر منصوبگ بندی ءُ دیمروئی کار اسد عمر، مزن وزیر ءِ مشیر تجارت عبدارلرزاق دائود، مشیر ھزانگ ڈاکٹر عبدالحفیظ شیخ، مشیر ڈاکٹر عشرت حسین، چیئرمین سرمایہ کاری بورڈ، چیئرمین ایف بی آر ءُ ایندگر کلانہ ایں اپسرگ ھم ساڑی اتنت۔ ڈل ءِ باسک آں کراچی پیکیج ، ملک ءَ صنعتی کار ھاسیں رنگ ءَ کسانیں ءُ درنیامی درجگ ءِ صنعت آنی دیمروئی ءِ ھوالگ ءَ حکومتی پالیشی ءُ گامگیج آناں ساڑات۔ ڈل ءَ کاروباری برات آنی استیں مشکل آنی بابت ءَ مزن وزیر ءَ را سرپد ھم کت۔ حکومتی ٹیمب ءَ کاروبار ءِ تہ ءَ آسانی پجاری کنگ ءُ کاروباری کار ءَ را آسان جوڑ کنگ ءِ ھوالگ ءَ چست کتگیں گامگیج آنی بابت ءَ دیوان ءَ را سرپد کت۔ مزن وزیر عمران خان ءَ دیوان ءَ گوں گشتانک دیان ءَ کاروبار ءِ تہ ءَ آسانی پیداک کنگ، گیر ضلوریگیں ریگولیشنز آنی ھلاسی، ٹیکس ءِ نظام ءِ تہ ءَ گہتری ءُ صنعتی کار آں گوں بندوکیں کاروباری برات آنی واستہ ھمک رنگیں آسراتی پجاری کنگ حکومت ءِ اولی ترجی داتگیں کار لیک ات۔ آئی ءَ گوشت کہ کاروباری برات آنی گوما گند ءُ نند ءِ رچ جاڑی مان ایت تانکہ اے شور ءُ مشور آناں چم ءِ چیرا کنان ءَ گہتری ءُ آسراتی دیگ ءِ کار ءَ را گیش دیم ءَ جنزینگ بہ بیت۔
