پنچ شنبے نادے 8 اکتوبر 2005 نا زمی جمب نا 15 می برسی ءِ اڈتننگا

اسلام آباد۔ 08 اکتوبر (اے پی پی) 8 اکتوبر 2005ء نا زمی جمب نا 15 می برسی ءِ پنچ شنبے نادے آ اڈتننگا۔ 15 سال مست ہندا دے آ سہب انا 8 بجہ ءُ 50 منٹ آ پاکستان نا قطبی علاقہ و کشمیر اٹی 706 شدت نا تباہ کن زمی جمب اس بسوسس۔ ہراٹی کم و ود ہزار آ بندغ آک زوال و ٹھپی مسوسر۔ ترند زمی جمب آن کیہی اسکول و ماڑیک تمار و 5 لکھ آن زیات بندغ زہمی مسر۔ لکھ آ ساہدارک ہم کسکر۔ زمی جمب آن ہفت لکھ 80 ہزار آن زیات ماڑی تے نسخان رسینگا۔ زمی جمب انا خڑک واقعہ اسکول و ہسپتال آتا ماڑی تے نسخان رسینگا۔ ترند زمی جمب آن پد دمدستی کمکی کارروائی تا کمک اٹ زہمی تے دمدستی کمک فراوان کننگا۔ سرکاری و نجی ادارہ غاک زیات آن زیات بشخ ہلکر و دا کوشست آتیٹی غٹ زہمی علاقہ غاتیٹی داسہ زند مست آنبار مسنے۔ صدی ٹی ڈیہہ ٹی دا غٹ آن بھلا زمی جمب ئس ہرانا پلویڑ اٹ کیہی خلق و کیہی بھلا شار بسوسر۔ غٹ آن زیات زہمی علاقہ غاتیٹی بالاکوٹ و مظفر آباد اوار ءُ۔ ملکی و جہانی کمکی کوشست آتیان زمی جمب نا نسخان تا جوان وڑاٹ مون ءِ توننگا۔ زہمی اسکول، ہسپتال داسہ پورو وڑاٹ فعال ءُ و مخلوق ہردے آنبار زند ءِ تیر کننگ ءُ۔ مچ آ ملک اٹی کیہی ہند آتیا زمی جمب سانحہ نا یات اٹی دود اڈتننگا و زمی جمب اٹ زوال کروک آتیکن بخشش و درجہ غاتا بڑزی کن دعا کننگا۔