بنجائی وزیر عمر ایوب خان نا پارت آ پیسکو چیف انا گندف گریڈ اسٹیشن نا دورہ

ایبٹ آباد۔ 08 اکتوبر (اے پی پی) بنجائی وزیر عمر ایوب خان نا خصوصی پارت آ پیسکو چیف ٹیم اتون اوار گندف نا ہند آ دورہ کرسا 132 کے وی اے گریڈ اسٹیشن نا جوڑ کننگ نا بابت گچین کروک آ جاگہ نا جاچ ءِ ہلک۔ سرجم حوال آتارداٹ بنجائی وزیر توانائی، پٹرولیم و قدرتی وسیلہ عمر ایوب خان نا کنڈآن گندف نا ہند آ 132 کے وی اے گریڈ اسٹیشن نا پوروی نا بابت پیسکو چیف آپریشن خادم حسین لارا تعلقدار ٹیم اتون اوار گندف نا ہند آ دورہ کرسا گریڈ اسٹیشن نا جوڑ کننگ کن گچین کروک آ جاگہ نا سرجم جاچ ءِ ہلک، داوخت آ بنجائی وزیر نا کوآرڈینیٹر ساجد خان، نعیم خان و ایس ای ہزارہ سرکل قاضی طاہر، ایکس ای این سردار ساجد تون اوار ایلو تعلقدار آفیسر آتیان بیدس ہندی بندغ آتا بھلو کچ اس ہم داوخت آ ساڑی ئسر۔ چیف پیسکو ہندی مخلوق تون گپ وتران کرسا پارے کہ بنجائی وزیر عمرایوب خان نا کنڈآن ہندا ہند آ گریڈ اسٹیشن نا پوروی آن نئے بیرہ بروک آ پنجا سال آن زیات وخت اسکان وولٹیج نا ویل انا چٹفنگ ممکن مریک بلکن علاقہ نا شونداری ٹی گریڈ نا جوڑ کننگ اسہ مزل نا نشان اس مریک۔ ہندی مخلوق بجلی و سوئی گیس نا ارب آ روپئی نا میگا پروجیکٹ آتیا خوشی نا درشانی ءِ کرسا السی سرکڑدہ عمر ایوب خان ءِ شاندار لوز آتیٹی خراج تحسین پیش کریر و اونا عملی السی خذمت آتا ستاءِ کریر۔