اسپیکر قومی اسمبلی نا اکتوبر 2005 ء نا زمی جمب نا 15 می برسی نا وخت آ کلہو

اسلام آباد۔ 08 اکتوبر (اے پی پی) اسپیکر قومی اسمبلی اسد قیصر پارینے کہ 8 اکتوبر 2005 ء نا زمی جمب پاکستانی قوم اکن اسہ آزمائش اس ئس و قوم دا آزمائش نا وخت اٹ ہرا سیوت و سخا و یکجہتی نا درشانی ءِ کرے او بے مٹ ئس، دا زمی جمب نا بھسکاری و داٹی شہید مروک آتے نن اینو اسکان گیرم کتنون و ہمو خاہوت ہرافتا دوست آک دا قدرتی آفت اٹ اوفتیان ہنار اوفتا غم اٹ بریبر نا شریک اُن۔ داخیال آتا درشانی ءِ او 8 اکتوبر 2005 ء نا زمی جمب نا 15 می برسی نا وخت آ تینا کلہو اٹی کرے۔ اسپیکر قومی اسمبلی پارے کہ 8 اکتوبر نا زمی جمب اٹی مچ آ قوم تینا مصیبت زدہ ایلم تتون سوگو ءُ دیوال اسے آنبار سلیسر۔ اوپارے کہ دا بے مٹ قومی سیوت و یکجہتی زہمی تے دُوارہ تینا نت تیا سلفنگ کن اسہ پوسکن ءُ حوصلہ و عزم اس تس۔ اوپرے کہ دا قدرتی آفت اٹ آزاد کشمیر و قطبی علاقہ غاتا 80 ہزار آن زیات بندغ زہید و لکھ آ بندغ آک بے اُرا مسر۔ اوپارے کہ زہمی تا بحالی اسہ مشکل ءُ مرحلہ اس ئس ولے قومی سیوت و یکجہتی و دوست ملک آتا کمک اٹ بحالی نا دا مشکل کاریم ممکن مس۔ اوپارے کہ ملک ءِ مون تروک چیلنج آتون مون تننگ کن 8 اکتوبر 2005 نازمی جمب والا قومی سیوت و یکجہتی نا درشانی ءِ کننگ نا گرج ءِ۔ اوپارے کہ ساڑی حکومت زمی جمب آن زہمی علاقہ غاتا شونداری کن سنبرینگوک ءِ و زہمی تا پورو بحالی کن ہروڑگام گیج کننگک۔ اوزمی جمب زہمی تا عزم و حوصلہ نا ستاءِ کرسا اللہ تعالیٰ آن زمی جمب اٹ شہید مروک آتا درجہ غاتا بڑزی و وطن عزیز ءِ داوڑنا آفت آتیان رکھ کننگ کن دعا کرے۔