مخدوم خسرو بختیار نا تعلقدار ادارہ غاتے پاکستان و جاپان نا ہڑتوم آ کنڈآتا ڈٹ آتے اولیتی بنداو تیا پورو کننگ نا پارت

اسلام آباد۔ 08 اکتوبر (اے پی پی) بنجائی وزیر اقتصادی امور مخدوم خسرو بختیار تعلقدار ادارہ غاتے پاکستان و جاپان نا ہڑتوم آ کنڈآتا ڈٹ آتے اولیتی بنداو تیا پورو کننگ نا پارت کرینے۔ او داہیت ءِ پاکستان اٹ جاپان نا ہڑتوم آ کنڈآتا ڈٹ آتا بابت جاچ دیوان نا کماشی ءِ کرسا پارے۔ دیوان اٹی جاپان تون برجا 57 ڈٹ آتا جاچ ءِ ہلنگا۔ دیوان اٹی پاننگاکہ جاپان تون معاہدہ غاتا دنگ توانائی، میٹروپولیٹن، ہوابازی و مواصلات آ محیط ءِ۔ بنجائی وزیر کورونا نا دین اتون مون تننگ کن جاپان نا کنڈآن 32 ملین ڈالرنا گرانٹ فراوان کننگ آ جاپان نا منت واری ءِ ہرفے و پارے کہ پاکستان اٹ شونداری ڈٹ آتے ترندی اٹ پورو کننگ انگ ءِ۔ اوپارے کہ ڈٹ آتے اسیجائی ریوو پالیسی نا رداٹ ترتیب تننگ نا گرج ءِ۔بنجائی وزیر پارے کہ ڈٹ آتا رپورٹنگ کن وڑوڈول اس تیار کننگ انگ ءِ۔ اوتعلقدار ادارہ غاتے پاکستان و جاپان نا ہڑتوم آ کنڈآتا ڈٹ آتے اولیتی بنداو تیا پورو کننگ نا پارت کرے۔