وزیر خارجہ مخدوم شاہ محمود قریشی نا انڈونیشیائی ہم منصب ءِ فون

واپاری کمکاری ءِ مون آ دننگ آ گپ وتران
اسلام آباد۔ 08 اکتوبر (اے پی پی) وزیر خارجہ مخدوم شاہ محمود قریشی پنچ شنبے نادے آ انڈونیشیانا وزیر خارجہ ریتنومارسودی اتون ٹیل فون آ رابطہ کرے۔ ترجمان دفترخارجہ نا رداٹ گپ و تران اٹی ہڑتوم آ کنڈآتا تعلقداری، اقتصادی و واپاری کمکاری ءِ مون آ دننگ تون اوار تین پہ تینی است خواہی نا اہم باندات آتیا گپ وتران کننگا۔ ہڑتوم آ وزیر خارجہ غاک ہڑتوم آ کنڈآتا سیاسی، زرگزرانی و واپاری تعلقداری تے پین مون آ دننگ آ امنا و پاکستان و انڈونیشیانا نیام اٹ ہڑتوم آ کنڈآتا سیاسی، اقتصادی و دفاعی تعلقداری تیا است جمی نا درشانی ءِ کریر۔ وزیر خارجہ اگست اٹ اقوام متحدہ سلامتی کونسل نا سرسہب صدارت و امن عالم کن کوشست آتیا انڈونیشیائی وزیر خارجہ ءِ مبارکبادی تس۔ انڈونیشیانا وزیر خارجہ اوغانستان اٹی امن کن پاکستان نا خیرخواہی نا کوشست آتا ستاءِ کرے۔ ہڑتوم آ وزیر خارجہ غاتا، ہڑتوم آ کنڈآتا سیاسی، زرگزرانی و واپاری تعلقداری ءِ پین مون آ دننگ آ امنا کریر۔ ہڑتوم آ وزیر خارجہ غاک اہم علاقائی و جہانی باندات آتیا سلابت ءِ برجاتخنگ و ڈیہہ ٹی امن کن اسیجا کوشست آتے کاریم اٹ اتنگ نا ہم عندیہ تسر۔ وزیر خارجہ تینا انڈونیشیائی ہم منصب ءِ پاکستان نا دورہ ءِ کننگ نا سلہ خلک ہرادے او منت واری اتون امنا کرے۔