اسلام آباد۔ 08 اکتوبر (اے پی پی) وزیراعظم عمران خان پارینے کہ پی ٹی آئی حکومت نا منشور الس نا عملی خذمت کننگ ءِ، سرکاری ادارہ غاتے ہر حال اٹ الس نا خذمت نا پابند کننگے، گورننس سسٹم نا گچینی الس و سرکاری ادارہ غاتا نیام اٹ گچین رابطہ غاتون گنڈوک ءِ۔ وزیراعظم آفس آن جاری بیان نا رداٹ سرکاری ادارہ، محکمہ غاتسکان نزور تپہ نا رسینگ ءِ پین آسان کننگ نا پرمان کننگانے۔ پاکستان سٹیزن پورٹل شاری تا شریداری گورننس نا مون آ دننگ کن جوڑ کننگانے تانکہ مخلوق نا ویل آتا ایسری کن سرکاری ادارہ غاک گچین خذمت فراوان کننگ کیر۔ وزیراعظم نا پارت آ ملک انا غٹ آن بھلا غاوتا نظام پورو فعال مسنے، غٹ صوبہ غاتیٹی سٹیزن پورٹل آ آفیسر آتا 8864 ڈیش بورڈ ءِ زمواری تننگانے ہرا وزیراعظم عمران خان نا نزور و بے سیخا بندغ آتیکن اسہ بھلو گام اسے۔ دا چرجوئی ٹی وزیراعظم آفس مچ آ ملک انا 8864 آن زیات سرکاری دفتر، غٹ بنجائی سیکرٹریز، چیف سیکرٹریز و آئی جی تے مراسلہ جاری کرینے ہرانا رداٹ سرکاری آفیسر آتے تینا ڈیش بورڈ آن نزور تپہ غاتا غاوتے درج کننگ نا پرمان کننگانے و خاص وڑاٹ بزرگ شاری، جنوزان زالبو، معذور بندغ آتا آسراتی کن خصوصی پارت جاری کننگانے۔ پی ایم ڈلیوری یونٹ سرکاری ادارہ غاتیکن ضابطہ اخلاق اس ہم جاری کرینے و داسہ ضرورت مند شاری تے تینا غاوتیکن تعلقدار ادارہ غا ہلننگ نا ضرورت مفک، خڑک انا سرکاری دفتر اٹ عملہ شاری نا غاو ءِ درج کننگ نا پابند مریک، سرکاری ادارہ غاک شاری نا غاو ءِ دمدستی وڑاٹ تعلقدار محکمہ غا گدریفنگ نا ہم پابند مریرہ۔ شاری تے آسراتی تیان معلومدار کننگ کن آگاہی مہم اس ہم بناکننگک۔
