اسلام آباد۔ 06 اکتوبر (اے پی پی) وزیراعظم نا سلاہکار واپار عبدالرزاق داؤد پارینے کہ رائس ایکسپورٹرز ایسوسی ایشن آف پاکستان (آرای اے پی) نا نمائندہ غاتون جوان ءُ اوڑدہی اس مسنے۔ ہراٹی بھارت نا کنڈآن یورپی یونین اٹ باسپتی برنج نا بارواٹی جیوگرافیکل انڈیکشن دعویٰ کننگ نا بابت درخواست تننگ آ گپ وتران کننگا۔ سے شنبے نادے آ تینا ٹویٹ اٹی عبدالرزاق داؤد پارے کہ بھارت نا کنڈآن باسپتی برنج نا بارواٹی دعویٰ ءِ حکومت بھاز سنجیدگی اٹ ہلکونے، نن گچین وسیلہ غاتے اٹ باندات آتے ہُننگ اُن۔ اوپارے کہ انٹیلکچوئل پراپرٹی آرگنائزیشن(آئی پی او) نا رداٹ بھارتی دعویٰ نا مخالفت ءِ کرینن، غٹ شریدار آتون سلابت کننگک تانکہ مون نا لائحہ عمل کن حکمت عملی اس پک کننگ مرے۔ پر پاکستان نا موقف ءِ پبی وڑاٹ تالان کننگ اُن و دانا بھاز جوان ءُ بھرم اس دوئی مننگ ءِ۔ بنجائی وزیر پارے کہ تدوک آ سال وزیراعظم عمران خان نا اقوام متحدہ نا جنرل اسمبلی آن تران نا وخت آ پاکستانی کمیونٹی نا پبی سپورٹ کشمیر نا ویل ءِ تالان کننگ اٹ اہم کڑد ادا کرے، اوپارے کہ پیشن نا ملک پاکستانی کمیونٹی نئے بیرہ کشمیر نا ویل آ اہم کڑد ادا کننگ ءُ بلکن بھارت نا ہندو انتہاپسند فاشٹ ایجنڈا ءِ پاش کننگ اٹ ہم دافتا بھلو اہم کڑد اسے۔ بنجائی وزیر داوخت آ ای یو پاک فرینڈ شپ فیڈریشن نا کڑد انا ستاءِ کرے و پارے کہ داوڑنا فورم کشمیری تا حق انا توار ءِ دنیا اسکان سرکننگ اٹ بھاز اہم ءُ۔ اودااومیت نا ہم درشانی ءِ کرے کہ آخبت اٹ کشمیری تا حق انا توار ءِ پین ہم جوان وڑاٹ چست کینہ۔ داوخت آ ای یو پاک فرینڈ شپ فیڈریشن نا چیئرمین کشمیر نا ویل آ تینا ادارہ نا کنڈآن کروک آ کوشست آتا بابت بنجائی وزیر ءِ معلومدار کرے۔ چوہدری پرویز اقبال لوسر بنجائی وزیرءِ کشمیر نا ویل ءِ یورپ اٹ پین تالان کننگ و دارداٹ پاکستانی کمیونٹی نا است بڈی ءِ کننگ کن بنجائی وزیر ءِ یورپ آ بننگ نا سلہ ہم خلک۔ بنجائی وزیر چوہدری پرویز اقبال لوسر ءِ اونا خذمت آتا صلہ ٹی اودے یات گاری شیلڈ اس ہم پیش کرے۔
