اسلام آباد۔ 06 اکتوبر (اے پی پی) بنجائی وزیر امور کشمیر و گلگت بلتستان علی امین کان گنڈاپور پارینے کہ ساڑی حکومت نا کوشست آتا سوب آن کشمیر نا ویل جہانی کہول آ پبی وڑاٹ تالان مسنے و دادیرینہ ویل آ پاکستان و کشمیری تا موقف ءِ پبی است بڈی دوئی مسنے۔ اوداخیال آتا درشانی ءِ ای یو۔ پاک فرینڈ شپ فیڈریشن یورپ نا چیئرمین چوہدری پرویز اقبال لوسر تون اوڑدہی ٹی کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی کشمیر نا ویل و دانا بابت پیشن نا ملک پاکستانی کمیونٹی ناکڑد آ سرجم گپ وتران کننگا، اوڑدہی ٹی بنجائی وزیر کشمیر نا ویل آ پیشن نا ملک رہینگوک پاکستانی تا کڑد ءِ خراج تحسین پیش کرسا پارے کہ جہانی کہول آ کشمیر نا ویل آ پاکستان و کشمیری تا موقف ءِ تالان کننگ اٹ پیشن نا ملک رہینگوک پاکستانی تا بھلو اہم کڑد اسے، اوپارے کہ یورپی پارلیمنٹ نا کنڈآن کشمیر نا ویل آ پدریسہ توار بڑز کننگ است جمی نا سوب ءِ۔ اوپارے کہ نئے بیرہ یورپ بلکن برطانیہ و امریکہ ٹی ہم رہینگوک آ پاکستانی و کشمیریک کشمیر نا ویل آ پاکستان نا موقف ءِ پبی وڑاٹ تالان کننگ ءُ و دانا بھاز جوان ءُ بھرم اس دوئی مننگ ءِ۔ بنجائی وزیر پارے کہ تدوک آ سال وزیراعظم عمران خان نا اقوام متحدہ نا جنرل اسمبلی آن تران نا وخت آ پاکستانی کمیونٹی نا پبی سپورٹ کشمیر نا ویل ءِ تالان کننگ اٹ اہم کڑد ادا کرے، اوپارے کہ پیشن نا ملک پاکستانی کمیونٹی نئے بیرہ کشمیر نا ویل آ اہم کڑد ادا کننگ ءُ بلکن بھارت نا ہندو انتہاپسند فاشٹ ایجنڈا ءِ پاش کننگ اٹ ہم دافتا بھلو اہم ءُ کڑد اسے۔ بنجائی وزیر داوخت آ ای یو پاک فرینڈ شپ فیڈریشن نا کڑد انا ستاءِ کرے و پارے کہ داوڑ نا فورم کشمیری تا حق انا توار ءِ دنیا اسکان سرکننگ اٹ بھاز اہم ءِ۔ اودااومیت نا ہم درشانی ءِ کرے کہ آخبت اٹ کشمیری تا حق انا توار ءِ پین زیات گچین وڑاٹ ہرفنہ۔ داوخت آ ای یو پاک فرینڈ شپ فیڈریشن نا چیئرمین کشمیر نا ویل آ تینا ادارہ نا کنڈآن کروک آ کوشست آتا بابت بنجائی وزیر ءِ معلومدار کرے۔ چوہدری پرویز اقبال لوسر بنجائی وزیر ءِ کشمیر نا ویل ءِ یورپ اٹ پین تالان کننگ و دارداٹ پاکستانی کمیونٹی نا است بڈی کن بنجائی وزیر ءِ یورپ آ بننگ نا سلہ ہم خلک۔ بنجائی وزیر چوہدری پرویز اقبال لوسر ءِ اونا خذمت آتا صلہ ٹی اودے یات گاری شیلڈ اس ہم پیش کرے۔
