اسلام آباد۔ 06 اکتوبر (اے پی پی) یورپی یونین نا پاکستان اٹ تعینات سفیر اندورولہ کامنارہ اسپیکر قومی اسمبلی اسد قیصر تون سے شنبے نا دے آ پارلیمنٹ ہاؤس اٹ اوڑدہی کرے۔ اوڑدہی ٹی پاکستان و یورپی یونین نا نیام اٹ پارلیمانی و اقتصادی کمکاری ءِ ودفنگ تون اوار تین پہ تینی است خواہی نا ایلو باندات آتیا گپ وتران کننگا۔ دا وخت آ گپ وتران کرسا اسپیکر قومی اسمبلی اسد قیصر پارے کہ پاکستان یورپی یونین تون تینا تعلقداری تے بھاز اہمیت ایتک۔ و پارلیمانی و اقتصادی بشخ آتیٹی کمکاری ءِ پین ودفسا اوفتے پین سوگو کننگ خواہک۔ اویورپی یونین نا کنڈآن بناکروک آ پارلیمانی پارٹنر شپ پروگرام نا ستاءِ کرسا دا پت انا درشانی ءِ کرے کہ دا پروگرام پارلیمنٹ نا باسک آتے پارلیمانی عمل اٹ پبی کڑد ادا کننگ اٹ کمکار مریک۔ اویورپی یونین نا کنڈآن پارلیمانی نظام نا سوگوی کن بناکروک آ تدوک آ پروگرام نا ہم ستاءِ کرسا پارے کہ دا پروگرام آن پارلیمنٹ نا باسک و پارلیمانی عملہ نا کاریم نا کچ اٹ ودکی مس۔ اسپیکر جی ایس پی پلس نا رداٹ پاکستانی مصنوعات آتا یورپی ملک آتا منڈی تسکان آسان رسینگ اٹ یورپی یونین نا کڑد انا ستاءِ کرے۔ اوپارے کہ جی ایس پی پلس نا دوئی کننگ آن پاکستان نا زرگزران ءِ مون آ دننگ دوئی مسنے۔ اسپیکر ملکی اقتصادی حالیت آتا ذکر ءِ کرسا پارے کہ پاکستان اٹ اقتصادی، صنعتی و واپاری بشخ آتیٹی زرکاری نا بھلو وارخواہی اس ساڑی ءِ و سی پیک نا رداٹ صنعت آتا جوڑ کننگ آن ملک اٹ زرکاری نا وارخواہی تیٹی پین ودکی مسنے۔ اومستی پارے کہ پاکستان نا ساڑی حکومت ملک ءِ شونداری نا کسر آ روان کننگ خواہک و دامسخت نا دوئی کننگ کن اقتصادی و صنعتی بشخ اکن زرکار دوست پالیسی وضع کننگ ءِ ہرافتیان یورپی یونین نا زرکار آک فائدہ ہرفنگ کیرہ۔ اسپیکر پارے کہ پاکستان اسہ زموار ءُ ملک اسے و او مدام جہانی باندات آتیٹی زموارانہ کڑد ادا کرینے۔
