اسلام آباد۔ 06 اکتوبر (اے پی پی) ملک اٹی بھلا صنعت آتا پیدواری سرجز آتیٹی پدریسہ ترندی بننگ ءِ۔ وزارت خزانہ نا حوالی نا رداٹ کوویڈ۔ 19 آن ودی مروک آ حالیت آتیان پد ہم جاری مالی سال انا اولیکو تُو اٹی مینو فیکچرنگ سرجز آتیٹی جون انا مقابلہ ٹی 905 درسد ودیکی ریکارڈ کننگا، سالانہ بنداو تیا مینو فیکچرنگ نا سرجزآتیٹی جولائی ٹی 5.02 درسد ودکی مس۔ آئل کمپنیز ایڈوائزری کمیٹی، وزارت صنعت و پیداوار و صوبائی بیوروز شماریات آن بالترتیب 11،36و 65 گڑاتا بارواٹی دوئی کروک ڈیٹا نا رداٹ جولائی 2020ء ٹی دا گڑاتا ودیکی ٹی بالترتیب 2.25،1و 1.77 درسد ودکی ریکارڈ کننگا۔ جولائی آن اگست ملک اٹی سیمنٹ نا کھپت اٹ 21.78درسد ودکی مس۔ ہندا وخت اٹی 8.258 میٹرک ٹن سیمنٹ نا کھپت ریکارڈ کننگا۔ تدوک آ مالی سال انا ہندا مد اٹی 6.863 میٹرک ٹن سیمنٹ نا کھپت ریکارڈ کننگاسس۔ سیمنٹ نا ملک انا تہہ ٹی کھپت اٹ 19.53و برآمد آتیٹی 32.2 درسد نا نمان ودکی مون آ بس۔ بھلو صنعت آتا پیداوار (ایل ایس ایم) نا 15 آن 12 بھلا بشخ آتیٹی جولائی ٹی 9.3 درسد نا ودکی مسنے، جاری مالی سال انا اولیکو تُو اٹی کولا و پٹرولیم مصنوعات آتا پیداوار اٹی 18.3 درسد نا نمان ودکی مس۔ تدوک آ مالی سال انا آخیریکو شش تُو اٹی کولا و پٹرولیم مصنوعات آتا پیداوار اٹی پدریسہ کمتی نا رجحان مون آ بسوسس۔ وزارت خزانہ نا رداٹ سالانہ بنداو تیا شربت، تمباکو، فارماسوٹیکل، غیر دھاتی معدنیات و پیپراینڈ بورڈ انا پیدوار اٹی ہم پدریسہ گچینی بننگ ءِ۔ ہنداوڑ آٹو موبائل نا بشخ اٹ ہم گچینی بننگ ءِ۔ اگست 2020ء ٹی کارتا بہاکننگ اٹ 8.3 درسد و بس و ٹرک آتا بہاکننگ اٹ بالترتیب 5 و1.1 درسد نا ودکی مسنے۔
