اسلام آباد۔ 05 اکتوبر (اے پی پی) بنجائی وزیر داخلہ اعجاز احمد شاہ اپوزیشن نا تحریک ءِ ریاست مخالفت گوندسا پارینے کہ مچ آ ملک اٹی جمہوریت نا پن آ ملک دشمن ریلی کشنگ نا موکل تفننگک۔ اسہ ہم جمہوری روایت اس داہیت انا اسُل موکل تفک کہ ادارہ غاتا شرف ءِ سرعام لتاڑنگے۔ دوشنبے نا دے آ وزارت داخلہ نا کنڈآن جاری بیان نا رداٹ بنجائی وزیر داخلہ اعجاز احمد شاہ پارے کہ نواز شریف اسہ مجرم اسے و عدالتی پرمان تے منپرسا پیشن نا ملک اٹ پناہ ہلسا ریاست مخالف پروپیگنڈا ءِ مون آ دننگ ءِ تانکہ او تینے احتساب آن بچفنگ کے۔ وزیر داخلہ اعجاز احمد شاہ پارے کہ نواز شریف ہراکہ تینٹ اسہ مجرم اسے و ناجوڑی نا بہانہ کرسا ملک آن نرانے داسہ پیشن نا ملک اٹ تولسا ریاست مخالف پروپیگنڈا ءِ مون آ دننگ ءِ۔ داسہ وخت اس کہ نواز شریف چاہک کہ اودے یاتو پلوک آ مال ءِ پدی تروئی تمک یا تو عدالت ءِ جوابدہ مروئی تمک تو او ریاستی ادارہ غاتا برخلاف توہین آمیز ایجنڈا نا بناءِ کرینے۔ وزیر داخلہ گپ وتران کرسا پارے کہ وزیراعظم عمران خان اِراسال مست تینا بنائی تقریر اٹ داہیت انا پڑو ءِ کریسس کہ اگہ سیاسی جماعت اسے داوڑ لگک کہ گچین کاری تیٹی دھاندلی مسنے تو او ہمووخت آ اوڑآ اعتراض ہرفنگ کیرہ۔ داسہ اِراسال آن پد گچین کاری تا شفافیت آ سوج انت اکن ہرفنگ انگ ءِ؟۔ وزیر داخلہ اعجاز احمد شاہ نا رداٹ دا ریلی تتون پاکستان نا گچینی و جمہوری روایت نا ہچ ءُ تعلق اس اف۔ دا ریاست مخالف ایجنڈا بیرہ ملک اٹ بے چیٹی تالان کننگ کن کننگ انگ ءِ۔ ہراڑآن پیشن نا و ملک دشمن تے ملک ءِ نسخان تننگ نا موقع ملک۔ دارداٹ وزیرداخلہ اعجاز احمد شاہ نا پاننگ ئس کہ پاکستان و اونا ادارہ غاتا رکھ ءِ پک کننگ ننا فرض ءِ و داڑآ ہچ وڑنا سمجھوتہ اس کننگپک۔
