اسلام آباد۔ 05 اکتوبر (اے پی پی) وزیر خارجہ مخدوم شاہ محمود قریشی تون سیلانی ویلفیئر ٹرسٹ انا چیئرمین مولانا بشیر فاروقی دوشنبے نادے آ وزارت خارجہ ٹی اوڑدہی کرے۔ اوڑدہی ٹی کورونا نا دینی حالیت آتون اوار تین پہ تینی است خواہی نا باندات آتیا گپ وتران کننگا۔ چیئرمین سیلانی ویلفیئر ٹرسٹ مولانا بشیر فاروقی وزیر خارجہ ءِ تینا فلاحی ادارہ نا خذمت آتیان درستی راستی کرفسا، کورونا دین اٹی لنگر خانہ غاتا جوڑ کننگ تون اوار چندی فلاحی کاریم تا بابت سرجم حوال تس۔ وزیر خارجہ فلاح انسانیت نا بابت سیلانی ویلفیئر ٹرسٹ انا خذمت آتا ستاءِ کرے و پارے کہ نزور تپہ غاتا راجی آسراتی کن مچ آ قوم زیات آن زیات بشخ ہلکر۔ شاہ محمود قریشی پارے کہ کورونا دین اٹی، نیزگار و مزور پیشہ خاہوت آتے بین آن بچفنگ کن نجی فلاحی ادارہ غاک ریاست تون اواری اٹ راشن نا بشخنگ تون اوار بھلو خذمت اس سرتسر۔ چیئرمین سیلانی ویلفیئر ٹرسٹ مچ آ دنیا ٹی کورونا دین انا سوب نوکری تیان دزکش مروک آ پاکستانی ورکرز آتا روزگار نا بحالی کن کوشست آتے کاریم اٹ اتنگ آ وزیر خارجہ نا خصوصی منت واری ءِ ہرفے۔
