استاد آتا کڑد راج انا شونداری و شونہالی ٹی کلیدی ءُ کڑد اس تخک، اسپیکر قومی اسمبلی نا استاد آتا دے آ کلہو

اسلام آباد۔ 05 اکتوبر (اے پی پی) اسپیکر قومی اسمبلی اسد قیصر پارینے کہ استاد آتا کڑد راج انا شونداری و شونہالی ٹی کلیدی ءُ اہمیت اس تخک۔ خوانفنگ ہمو مقدس آ پیشہ ءِ ہرادے اللہ تعالیٰ تینا نبی تے انسانیت نا راجی آسراتی و اصلاح کن تسونے۔ خاتم النبین حضرت محمد صلی اللہ علیہ و آلہ وسلم استاد آتا عزت و شرف ءِ المی گوندانے۔ داخیال آتا درشانی ءِ او استاد آتا جہانی دے انا وخت آ تینا کلہو اٹی کرے ہرا ہر سال 5 اکتوبر آ اقوام متحدہ نا کنڈآن مچ آ دنیا ٹی اڈتننگک۔ اسپیکر استاد آتے خراج تحسین پیش کرسا پارے کہ استاد آک قوم انا جوڑ کروک ءُ ہرا قوم انا سرسہبی و کامرانی نا دوئی کننگ اٹ سیڑھی نا کڑد ءِ ادا کیرہ۔ اوپارے کہ ننا مذہب علم انا دوئی کننگ ءِ بھاز اہمیت ایتک و استاد آک ورناچین ءِ علم آن روشناس کننگ اٹ بنداوی کڑد ادا کیرہ۔ اسپیکر پارے کہ اینو نادے ہمو عظیم ہستی تے خراج تحسین پیش کننگ نادے ءِ ہرا تینا جاں فشانی، ہمت و لگن اٹ اسہ تعلیم یافتہ قوم اس جوڑ کیرہ۔ اسپیکر پارے کہ ملک اٹ تعلیم ءِ مون آ دننگ ساڑی حکومت نا اولیت آتیٹی اوار ءِ و دامسخت نا دوئی کننگ کن استاد آتے اوفتا روا ہند تننگ المی ءِ۔ اوپارے کہ ساڑی حکومت استاد آتا راجی آسراتی و راج اٹ اوفتے روا ہند اس ترفنگ کن پبی گام گیج کننگ ءِ۔ داوخت آ ڈپٹی اسپیکر قاسم خان سوری تینا کلہو اٹی پارے کہ استاد اسہ پیغمبری ءُ پیشہ سے، ہراڑتون وابستہ مننگ اسہ اعزاز اسے۔ اواستاد آتا کوشست آتے خراج تحسین پیش کرسا پارے کہ اسہ باشعور و تعلیم یافتہ راج اسے نا ٹہیفنگ اٹ استاد آتا کڑد بھاز اہمیت تخک۔ اوپارے کہ استاد آتے اسلام روحانی لمہ و باوہ نا درجہ تسنے ہنداخاطرآن اوفتا عزت و شرف ننے آ غٹ آ فرض ءِ۔ اویوم استاد آتا جہانی دے انا وخت آ استاد آتے سلام پیش کرسا پارے کہ اینو نن انتس کہ ارین تینا استاد آتا سوب آن اُن و اوفتا خذمت آتے خراج تحسین پیش کینہ۔