اسلام آباد۔ 02 اکتوبر (اے پی پی) وزیراعظم عمران خان پارینے کہ راوی ریور فرنٹ اربن ڈویلپمنٹ ڈٹ لاہور شار انا بحالی، ودوک آ آبادی نا گرج آتے پورو کننگ، دیر انا کاختی ءِ مُر کننگ و لاہور تون اوار مچ آ صوبہ ٹی زرگزرانی عمل ءِ ترند کننگ نا بابت کلیدی ءُ ڈٹ اسے، دا ڈٹ آن نوکری و زرگزرانی سرجز آتا بے کچ وارخواہی ودی مریک۔ داخیال آتا درشانی ءِ او جمعہ نادے آ تینا کماشی ٹی راوی ریور فرنٹ اربن ڈویلپمنٹ پروجیکٹ آ عملدرآمد اٹ داتم اسکان نا پیش رفت نا بابت جاچ دیوان آن تران کرسا کرے۔ دیوان اٹی وزیراعلیٰ پنجاب سردار عثمان بزدار، چیئرمین نیا پاکستان ہاؤسنگ اینڈ ڈویلپمنٹ اتھارٹی لیفٹیننٹ جنرل (ر) انور علی حیدر، چیف سیکرٹری پنجاب، چیئرمین ایف بی آر، چیئرمین روڈا(راوی اربن ڈویلپمنٹ اتھارٹی) و زرکار و تعمیراتی بشخ اتون گنڈوک پنی آ شخصیت آک بشخ ہلکر۔ دیوان اٹی راوی ریور فرنٹ اربن ڈویلپمنٹ پروجیکٹ آ داتم اسکان مروک آ پیش رفت و ڈٹ آ عملدرآمد نا بابت چندی مرحلہ و اوفتا تخوک ٹائم لائنزتا بابت سرجم گپ وتران مس۔ زرکار و تعمیراتی بشخ اتون گنڈوک پنی آ شخصیت آتا کنڈآن ڈٹ اٹ پبی است خواہی نا درشانی ءِ کننگا۔ وزیراعظم عمران خان دیوان آن تران کرسا پارے کہ راوی ریور فرنٹ اربن ڈویلپمنٹ ڈٹ لاہور شار انا بحالی، ودوک آ آبادی نا گرج آتے پورو کننگ، دیر انا کاختی ءِ مُر کننگ و لاہور تون اوار مچ آ صوبہ ٹی زرگزرانی عمل ءِ ترند کننگ نا بابت کلیدی ءُ ڈٹ اسے۔ اوپارے کہ ڈٹ آ عملدرآمد آن نئے بیرہ لاہور شار انا گرج آک پورو مریرہ بلکن دا ڈٹ انا سوب آن نوکری و زرگزرانی سرجز آتا بے کچ وارخواہی ودی مریک۔ وزیراعظم پارے کہ ڈٹ آ تخوک آ ٹائم لائن تیٹی عملدرآمد حکومت نا اولیت ءِ۔ وزیراعلیٰ پنجاب نا کنڈآن وزیراعظم ءِ پاننگاکہ اونا ویژن و حکومتی اولیت آتے مون آ تخسا بڑزکو کہول آ دا ڈٹ اٹ مروک آ پیش رفت آ نظر شاغنگ انگ ءِ و عملدرآمد نا بابت پک مروک ہدف آتا تخوک آ وخت اٹ پوروی ءِ پک کننگک۔
