اسلام آباد۔ 02 اکتوبر (اے پی پی) پاکستان نوگورکاراباخ اٹ آرمینیا نا فوج انا برخلاف آذربائیجان نا فوج اتون اواری اٹ پاکستانی فوج انا جنگ کننگ نا بارواٹ میڈیا حوال آتے مسترد کرسا اوفتے بے بنداو و قیاس آراءی تیا مبنی گوندانے و پارینے کہ داوڑنا رپورٹ و حوال آک بھاز غیر زموارانہ ءُ۔ جمعہ نادے آ ترجمان دفترخارجہ پارے کہ پاکستان نوگورنوکارا باخ انا ڈیہہ ٹی سیکورٹی نا بگڑینگوک حالیت آتیا سخت گڑتی ءِ، ترجمان پارے کہ آذربائیجان نا شاری آبادی آ آرمینیائی فوج انا کنڈآن گولہ باری قابل مذمت و است ہسونی نا سوب ءِ۔ ترجمان پارے کہ ڈیہہ ٹی امن و سلامتی ءِ مون تروک خطرہ غاتیان بچنگ کن آرمینیا ءِ تینا کارروائی ءِ سلفوئی مریک، زاہد حفیظ چوہدری پارے کہ پاکستان نوگورونوکاراباخ انا بابت آذربائیجان نا موقف نا مخ تفی ءِ کیک۔ نوگورونوکاراباخ آ آذربائیجان نا موقف اقوام متحدہ نا سلامتی کونسل نا امنائی وڑاٹ منظور کروک آ قرارداد آتا رداٹ ءِ۔
